Վատիկանի մամուլի ծառայության խոսնակ Ֆեդերիկո Լոմբարդին հայտարարել է, որ հուլիսի 1-ից Վատիկանի ռադիոյի հեռարձակումը կարճ և միջին ալիքներով դադարեցվում է Եվրոպայում և Ամերիկայում: Ինչպես հաղորդում է «Ազատություն» ռադիոկայանի ռուսական ծառայությունը, այս որոշումը նոր ռազմավարության մի մասն է, որը նախատեսում է վերահեռարձակել ծրագրերը տեղի և տարածաշրջանային ռադիոկայանների ցանցի միջոցով, ինչպես նաև ավելացնել ինտերնետ-հեռարձակումը:
Որպես նոր հաղորդակցման ռազմավարության բաղկացուցիչ մաս՝ այդ միջոցառումը հնարավորություն կտա նվազեցնել ակուստիկ և էլեկտրոմագնիսային «աղտոտվածությունը», որն առաջանում է Վատիկանի ռադիոյի հաղորդիչներից:
Միջին և կարճալիքային հաղորդակցման հեռարձակումները, չնայած ծավալի զգալի կրճատմամբ, կշարունակվեն Աֆրիկայի, Մերձավոր Արևելքի և Ասիայի խնդրահարույց երկրներում, որտեղ բնակչությունը ռադիոծրագրերին հետևելու այլընտրանք չունի:
Վատիկանի ռադիոն հնագույն միջազգային ռադիոկայան է, որը հեռարձակվում է 40 լեզուներով: Անցյալ տարի նա նշեց իր 80-ամյակը:
