Հայտնի ամերիկացի մեծահարուստ Ջորջ Սորոսը մարիխուանայի օգտագործումը օրինականացնելու կոչ է արել: Այս մասին գրում է RBC-ն` հղում անելով The Wall Street Journal-ին: Սորոսը կարծում է, որ եթե ամերիկյան իշխանություններն օրինականացնեն մարիխուանայի օգտագործումը եւ վաճառքը, ապա պետությունը մեծ գումարներ կարող է տնտեսել: Իսկ հիմա այդ գումարները ծախսվում են մարիխուանայի դեմ պայքարի համար: Ամեն տարի մարիխուանայի փոքր չափաբաժինների համար երկրում ձերբակալվում է մոտ 750,000 մարդ, ինչը կազմում է թմրանյութերի համար բոլոր ձերբակալվածների մոտ 40%-ը: Ըստ Սորոսի` դրա օրինականացումը զգալիորեն կպակասեցնի օրինախախտումների եւ հանցագործությունների քանակը, կաշառակերությունը, որը նարկոբիզինեսի անբաժան մասն է: Ոստիկանությունն էլ իր ողջ ուժերը կուղղի այլ` ավելի լուրջ հանցագործությունների բացահայտմանը:
Բացի այդ, մարիխուանայի օրինականացումից կթուլանա թմրաբիզինեսով զբաղվող մաֆիան, որն անօրինական վաճառքներից հսկայական գումարներ է ստանում: Կքչանա միջռասայական լարվածությունը, քանի որ սեւամորթներն ու սպիտակամորթները հավասարապես օգտագործում են մարիխուանա, բայց ձերբակալվածների մեծ մասն այս գործերով սեւամորթներ են:
Սորոսը նաեւ ավելացնում է, որ մարիխուանա արգելող օրենքն ընդունվել է 20-րդ դարի սկզբին, եւ անհրաժեշտություն է առաջացել այն վերանայել: Պետք է գումարներ ներդնել ոչ թե մարիխուանայի տարածման դեմ, այլ դրա վնասների մասին քարոզչություն անելու ուղղությամբ: