Քիչ առաջ Եգիպտոսի նախագահ Հոսնի Մուբարաքը ելույթ ունեցավ երկրի ազգային հեռուստատեսությամբ: Նա հայտարարեց, որ չի պատրաստվում առաջիկա նախագահական ընտրությունների ժամանակ, որոնք կայանալու են այս տարվա աշնանը, առաջադրվել որպես նախագահի թեկնածու:
Նա նաև հայտարարել է, որ առաջիկա ամիսների ընթացքում կիրականացնի համապատասխան բարեփոխումներ, այդ թվում` սահմանդրության մեջ, որպեսզի ապահովվեն համապատասխան ժողովրդավարական պայմաններ ընտրությունների համար:
Վերջին իրադարձությունների մասին խոսելիս Մուբարաքն ասեց, որ հանձնարարել է փոխնախագահ Օմար Սուլեյմանին` քննարկումներ սկսել բոլոր քաղաքական ուժերի հետ: Սակայն նաև նշեց, որ կան քաղաքական ուժեր, որոնք օգտագործում են ներկա իրավիճակը:
Մուբարաքը նաև նշել է, որ Եգիպտոսի համար շատ բան է արել, և չի պատրաստվում այն լքել: Եգիպտոսի գործող նախագահը հայտարարել է, որ հպարտ է երկար տարիներ ժողովրդին ծառայելու համար, և այս հողն իրենն է, ինչպես բոլոր եգիպտացիներինը: «Ես պաշտպանել եմ այս հողը և պատրաստվում եմ մեռնել այս հողում», եզրափակել է նա:
Ելույթից անմիջապես հետո Եգիպտոսի մեծ քաղաքների հրապարակները, որտեղ հավաքված են Մուբարաքի հրաժարականը պահանջող հարյուր հազարավոր ցուցարարներ, պայթել են` բացականչելով «հեռացի՛ր, հեռացի՛ր», «հեղափոխություն մինչև մահ» և այլն:
Ակնհայտ է, որ Հոսնի Մուբարաքը գնում է բացահայտ առճակատման, քանի որ ցուցարարները, որոնք աջակցություն ունեն բնակչության մեծամասնության շրջանում, պատրաստվում են լքել փողոցները միայն Մուբարաքի հրաժարականից հետո: Փաստորեն, Մուբարաքը չկատարեց նրանց` մինչև ուրբաթ օրը հեռանալու պահանջը, և առաջիկա ուբաթ օրը, որն ընդդիմությունն անվանել է «Հեռացման ուրբաթ», կարող է լինել էլ ավելի արյունոտ, քան հունվարի 28-ը, երբ տարբեր տվյալներով զոհվել է 150-300 մարդ, իսկ ավելի քան 4000 հոգի վիրավորվել են: