Այս պահին Al-Jazeera հեռուստաընկերությունը ուղիղ եթեր է վարում Կահիրեի կենտրոնական Թահրիր հրապարակից, որտեղ հավաքվել են հարյուր հազարավոր մարդիկ: Հեռուստաընկերությունը տեղեկացնում է, որ այդ հրապարակում և հարակից տարածքներում հավաքված է ավելի քան 1 միլիոն մարդ:
Ընդդիմությունը հայտարարել էր այսօր «միլիոնների երթի մասին», և նրան այս պահին հաջողվել է հավաքել ավելի քան մեկ միլիոն մարդ: Նախատեսվում է, որ ցուցարարները քիչ անց ուղղվելու են դեպի նախագահական նստավայր: Մարդիկ մի քանի հազարանոց խմբերով երթեր են անում Կահիրեի փողոցներով` կոչ անելով միանալ բողոքին:
1 միլիոն մարդ հավաքվել է նույնիսկ այն պայմաններում, երբ հայտնի է դարձել, որ բանակը փակել է Կահիրե եկող բոլոր ճանապարհները:
Հայտնի է նաև, որ ընդդիմությունը հանդես է եկել համատեղ հայտարարությամբ, որով մերժել է Մուբարաքի առաջարկած՝ կարգավորման բանակցությունները և կրկին պնդել է նրա հրաժարականի պահանջը:
Նրանք նաև հայտնել են կոալիցիոն կառավարություն ստեղծելու անհրաժեշտության, ինչպես նաև Ազգային խորհրդի ստեղծման մասին, որը համապատասխան սահմանադրական փոփոխություններ կիրականացնի, որից հետո ընտրություններ կանացկացվեն պետական բոլոր մարմիններում: