ՀՀ սպորտի և երիտասարդության հարցերի նախարարության ֆինանսավորմամբ, Սյունիքում «Երկյակ» ԵՀԿ-ն իրականացնում է «Բացենք մեր աչքերը» դրամաշնորհային ծրագիրը:
Այն ուսուցողական է և նպատակ ունի դասընթաց-վարժանքների միջոցով բարձրացնելու դեռահասների և ուսանողների գիտելիքները ՄԻԱՎ/ՁԻԱՀ-ի մասին: Քաջարանի դպրոցներում ողջունել են ծրագիրը, սակայն մանկավարժների մտավախությունն այլ է:
«Չի լինի՝ մի գրանտային ծրագիր էլ գրվի հայկական եթերից անհեթեթությունները հանելու համար»,- կես կատակ, կես լուրջ ասացին մանկավարժները:
Ռուսաց լեզվի ուսուցիչների խոսքով, դասաժամերին իրենք գրեթե խուսափում են օգտագործել աղավնի` «голубь, голубка» և երկնագույն, կապույտ` «голубой» բառերը: Հատկապես երկրորդից բարձր դասարաններում սովորողները ոգևորվում են ու հիշում հայկական եթերը:
Մնում է միայն դասերից հետո հայտնի մուլտֆիլմի նման ծնողներից հարցնել` «Մա՛մ, «գալուբոյը» շա՞տ վատ բան է»…
