Քաղաքագետ Երվանդ Բոզոյանը կարծում է, որ ՀԱԿ-ի անցումը խորհրդարան միանշանակ է, իսկ հիմնական վերադասավորումները լինելու են ՀՀԿ-ի եւ ԲՀԿ-ի միջեւ. «ՀՀԿ-ն հայտարարում է, որ վերահսկիչ փաթեթը լինելու է իր ձեռքում, ԲՀԿ-ն հայտարարում է, որ չի հանդուրժի դա։ Բոլորը հասկանում են, որ ապագա խորհրդարանում կլինի նաեւ ՀԱԿ–ը»: Սակայն ըստ Բոզոյանի` խորհրդարանական ընտրություններում ՀԱԿ-ը հիմնական դերակատարը չի լինի, ինչպես 2008-ի նախագահական ընտրությունների ժամանակ: Նրա կանխատեսումներով, խորհրդարանում մանդատներ կունենա նաեւ Դաշնակցությունը, իսկ «Ժառանգության» ապագան Բոզոյանի համար դեռ մշուշոտ է: Հարցին, թե արդյոք ՀԱԿ-ը խորհրդարան անցնելուց հետո կհանձնի իր մանդատները, ինչպես ավագանիների խորհրդի ընտրություններում, քաղաքագետն ասաց. «Ամեն ինչ կախված է քաղաքական գործընթացից։ Եթե ՀԱԿ–ը զգա, որ ինքը բավականին ուժեղ է եւ պատկառելի կշիռ ունի պայքարելու համար, ապա նա կգնա այդպիսի քայլի՝ կհրաժարվի։ Եթե իրադրությունն այնպես լինի, որ, ըստ էության, ամեն ինչ փոխվի, եւ ՀԱԿ-ը չդառնա կենտրոնական դերակատար, այս պարագայում ես չեմ կարող ասել, թե նա ինչ դիրքորոշում կընդունի»։ Սակայն ըստ Բոզոյանի ներկայիս տպավորությունների` ՀԱԿ-ը կարող է հրաժարվել մանդատներից։
