«Թրանսփարենսի ինթերնեյշնլ» հասարակական կազմակերպության հայաստանյան մասնաճյուղը հրապարակեց 2010 թ. կոռուպցիայի ընկալման համաթիվը (ԿԸՀ): 2010 թ. ԿԸՀ աղյուսակում ընդգրկված աշխարհի 178 երկրների գրեթե երեք քառորդի համաթվի արժեքները ցածր են հինգ միավորից (0-ից 10 սանդղակով, որտեղ 0-ն` բացարձակապես կոռումպացված, իսկ 10-ը` չկոռումպացված լինելու ընկալումն է), ինչը ցույց է տալիս կոռուպցիայի` լուրջ հիմնահարց լինելու իրողությունը: 2010 թ. ԿԸՀ աղյուսակից երեւում է, որ առավել քիչ կոռումպացված երկրներն են Դանիան, Նոր Զելանդիան եւ Սինգապուրը, որոնք համաթվի 9, 3 արժեքով կիսում են առաջինից երրորդ տեղերը: Աղյուսակի նախավերջին երկու տեղերում ԿԸՀ 1, 4 արժեքով գտնվում են Աֆղանստանն ու Մյանման, իսկ աղյուսակը 1, 1 արժեքով եզրափակում է Սոմալին: 2009 թ. համեմատ` 2010 թ. համաթվի արժեքների բարելավում է գրանցվել Բութանում, Չիլիում, Էկվադորում, Մակեդոնիայում, Գամբիայում, Հաիթիում, Ճամայկայում, Քուվեյթում եւ Քաթարում: 2009 թ. համեմատ` 2010 թ. նահանջ են արձանագրել Չեխիան, Հունաստանը, Հունգարիան, Իտալիան, Մադագասկարը, Նիգերը եւ ԱՄՆ-ն: Աղյուսակից երեւում է, որ հետընթաց արձանագրած պետությունների շարքում հայտնվել են այնպիսիք, որոնք իրենց թափանցիկության եւ օրինավորության պակասի պատճառով առավել շատ տուժեցին ֆինանսական ճգնաժամից: Հետաքրքիր է, որ առաջընթաց արձանագրած պետությունների շարքում չկա գեթ մեկ զարգացած տնտեսությամբ պետություն: Նախկին ԽՍՀՄ երկրներից այս տարի միայն Էստոնիան է իր ԿԸՀ 6, 5 արժեքով պահպանել առավել քիչ կոռումպացված պետության կարգավիճակը: Էստոնիան այս տարի դարձավ միանձնյա առաջատար նաեւ նախկին կոմունիստական երկրների շարքում (նախորդ տարի այն կիսում էր առաջին տեղը Սլովենիայի հետ): Հայաստանի ԿԸՀ արժեքը շարունակում է իր դանդաղ հետընթացը, եւ 2009 թ. համեմատ` 2010 թ. այդ արժեքը նվազեց եւս 0, 1-ով` 2, 7-ից իջնելով 2, 6-ի: Ուշագրավ է, որ իր այդ ցուցանիշով Հայաստանը 2010 թ. ԿԸՀ աղյուսակում Էրիթրեայի, Մադագասկարի եւ Նիգերի հետ կիսում է 123-ից 126-րդ տեղերը (անցյալ տարի Հայաստանը կիսում էր 120-ից 125-րդ տեղերը):
