Հովիկ Աբրահամյանն այսօր հայտարարեց, թե ինքը որեւէ նպատակ, ցանկություն չունի խոչընդոտելու լրագրողների աշխատանքը: «Հակառակը, ես ուզում եմ, որ ձեր աշխատանքը լինի արդյունավետ»,- այսօր լրագրողների հետ զրույցում ասաց ԱԺ նախագահ Հովիկ Աբրահամյանը` անդրադառնալով լրագրողների բարձրացրած խնդիրներին։ Հիշեցնենք, որ նիստերի նորակառույց դահլիճում աշխատանքի առաջին օրը լրագրողները բողոքել էին, որ իրենց աշխատանքային պայմաններն ապահովված չեն: Աբրահամյանը խոստացավ կարգավորել բոլոր տեխնիկական խնդիրները, բայց ասաց, թե ինքը չի կարող խոստանալ, որ կվերացվեն լրագրողական օթյակները դահլիճից բաժանող ապակիները: «Դուք էլ մի՛ ուզեք էլի աղայավարի ապրել… Դուք լրագրող եք, պիտի գնաք, հետեւեք.. Ձեր համար հո չե՞նք կարող միջանցքները կարճացել»,- ասաց նա: Երբ լրագրողները շարունակեցին դժգոհել աշխատանքային պայմաններից, ԱԺ նախագահը նշեց. «Իմ կարծիքով, ես լուրջ մարդ եմ: Մի անգամ ասացի, ուրեմն այդպես կլինի»:
