Անցած օրերին Ռուսատանի նախագահ Դմիտրի Մեդվեդեւը այցելել էր Թուրքմենստան: Այցի ընթացքում ոչ մի փաստաթուղթ չստորագրվեց, բայց ինչպես հաղորդում են Աշգաբադում ռուսական Коммерсант-ի թղթակիցները, կողմերը պայմանավորվել են դադրեցնել մերձկասպյան գազամուղի կառուցումը, մինչեւ Եվրոպայում մեծանա պահանջարկը: Միաժամանակ, որպեսզի Թուրքմենստանը չգայթակղվի իր գազը Nabucco-ին վաճառելու հնարավորությամբ, ռուսներն առաջարկել են օգնել նրան կառուցելու գազամուղը դեպի հարավային Ասիա` Աֆղանստանով եւ Պակիստանով մինչեւ Հնդկաստան:
Թեպետ կողմերը ոչ մի փաստաթուղթ չեն ստորագրել, եւ գրեթե ամբողջ այցն անցել է կերուխումի մթնոլորտում, սակայն կարճատեւ բանակցությունները հեշտ չեն ընթացել: Թուրքմենստանի նախագահ Գուբանգուլի Բերդիմուխամեդովին հետաքրքրում էր, թե ինչ ճակատագիր է ունենալու մերձկասպյան գազամուղը: Հիշեցնենք, որ Ռուսաստանը, Թուրքմենստանը եւ Ղազախստանը պայմանավորվել էին, որ այդ գազամուղով միջինասիական գազը մատակարարվելու է Եվրոպա` տարեկան 20 խորանարդ մետր ծավալով: Սակայն նախագիծը մնացել է թղթի վրա: Բացի այդ` թուրքմենական կողմը ցանկանում էր նաեւ իմանալ, թե «Գազպրոմը» որքան գազ է մտադիր գնել Թուրքմենստանից: Անցած տարի, երբ Աշգաբադ էր այցելել Մեդվեդեւը, ստորագրվեց նոր պայմանագիր, համաձայն որի` ռուսական կողմն արդեն պետք է գներ ոչ թե 80-90 մլրդ խորանարդ մետր գազ, ինչպես ամրագրված էր հին պայմանագրով, այլ 10-30մլրդ, ինչպես սահմանում էր նորը: Բացի այդ` եթե Ռուսաստանը թուրքմենական գազը նախկինում գնում էր եվրոպական գներով, ապա հիմա այդ գները սահմանվում են բորսայական գների հետ: Այս հարցերի պատասխանը Թուքրմենստանի նախագահը ստացել է: Ինչպես թերթին հաղորդել է Ռուսաստանի փոխվարչապետ Իգոր Սեչինը, ռուսական կողմը ներկայացրել է մերձկասպյան գազամուղի վերաբերյալ իր տեսակետը` հայտնելով, որ դրա կառուցումը կսկսի այն ժամանակ, երբ Եվրոպայում կավելանա դրա պահանջարկը: Ինչ վերաբերում է թուրքմենական գազի գնման ծավալներին, ապա Սեչինի խոսքերով, այն այս տարի կկազմի 10-12 մլրդ խորանարդ մետր, իսկ հաջորդ տարվա ծավալները դեռ պետք է ճշտվեն: Այս վերջին հայտարարությունն անակնկալ է եղել թուրքմենական կողմի համար: Բացի այդ` գազային բանակցությունները բարդանում են այն պատճառով, որ անցած տարի Միջին Ասիա-Կենտրոն նավթամուղի պայթյունից հետո հարաբերությունները «Գազպրոմի» հետ վատացել են, եւ հավանաբար հաջորդ տարվա ծավալները որոշելիս այդ ընկերությունը միայնակ չի կարող այդ հարցը լուծել թուրքմենական կողմի հետ, դրան հավանաբար կմիանա նաեւ փոխվարչապետ Սեչինը:
Սա, թուրքմենական դիվանագետների հավաստամամբ, կարող է դրդել Բերդիմուխամեդովին թեքվել դեպի Nabucco:Եվ որպեսզի սա տեղի չունենա, ռուսական կողմն առաջարկել է իր աջակցությունը դեպի Հնդկաստան կառուցվելիք գազամուղը համատեղ կյանքի կոչելու հարցում:
Հոդվածն ամբողջությամբ կարդացեք kommersant.eu կայքում: