Միեւնույն է, «քաղբանտարկյալ» տերմինը չի ընդունում

ՀՀ մարդու իրավունքների պաշտպանի հրավիրած մամլո ասուլիսներից այն տպավորությունն ես ստանում, որ մեր երկրում ո՛չ քաղբանտարկյալներ կան, ո՛չ խոսքի ազատության, ազատ տեղաշարժի, ցույցեր, երթեր, հանրահավաքներ անցկացնելու հետ կապված խնդիրներ:
Երեկ փորձեցինք իմանալ Արմեն Հարությունյանի կարծիքը օրեր առաջ Երեւանում Եվրախորհրդի հովանու ներքո կազմակերպված «Հանուն ժողովրդավարության ապագայի» ֆորումում եվրոպացի չինովնիկների հնչեցրած տեսակետների վերաբերյալ: Արմեն Հարությունյանին հիշեցրինք, որ Եվրոպայի խորհրդի գլխավոր քարտուղար Թյորբորն Յագլանդը ֆորումի ժամանակ մտահոգություն էր հայտնել, որ Հայաստանում չպետք է լինեն «քաղաքական հայացքների համար կալանավորված անձինք»: Ինչպե՞ս է Արմեն Հարությունյանը գնահատում այն:
– Շատ նորմալ: Բայց դրա հետ մեկտեղ, Յագլանդն ինքը չի կոնկրետացրել, թե ովքե՞ր են քաղբանտարկյալ եւ ի՞նչ չափանիշներով է որոշվում` մարդը քաղբանտարկյա՞լ է, թե՞ ոչ: Իհարկե, ո՞վ է դեմ, բոլորս էլ համաձայն ենք, որ քաղաքական հայացքների համար մարդիկ չպետք է կալանավորվեն: Մնում է ապացուցել` տվյալ դեպքում մարդը քաղաքական հայացքների համա՞ր է կալանավորված, թե՞ ոչ:
– Հիմա Դուք գտնում եք, որ Հայաստանում քաղաքական հայացքների համար կալանավորված անձինք չկա՞ն:
– Ես քաղաքական հարցերով չեմ հետաքրքրվում: Իրավական հարթությունում այդպիսի տերմին` քաղբանտարկյալ չկա: Եվրոպայի խորհրդից, միջազգային կազմակերպություններից այստեղ մարդիկ էին եկել: Եթե Դուք գտնեք որեւէ մեկին, որն այդպիսի հայտարարություն է արել…
– Նույն ԵԽ գլխավոր քարտուղար Յագլանդն իր մտահոգությունն էր հայտնել Հայաստանում արտահայտվելու ազատության մասին` նշելով, որ ազատ արտահայտվելու իրավունքը ճշմարտության մայրն է: Դա ուղղակի «մեսիջ» չէ՞ ՀՀ իշխանություններին, որ մեր երկրում խոսքի ազատության իրավունքը չի հարգվում:
– Այդ կոնֆերանսում բոլորը փաստեցին, որ նույնիսկ կայացած ժողովրդավարություններում ժողովրդավարության ճգնաժամ կա: Եթե կայացած ժողովրդավարություններում ճգնաժամ կա, ինչպե՞ս կարող է կայացող ժողովրդավարություններում ճգնաժամի խնդիր չլինել: Իհարկե, պրոբլեմներ կան:
– Ձեր կարծիքով, ՀՌԱՀ հայտարարած կապուղիների մրցույթում «Ա1+»-ը ունի՞ հաղթելու շանս, թե՞ ոչ:
– Չգիտեմ: «Ա1+»-ը շատ պրոֆեսիոնալ է, բայց «Արմնյուզն» էլ է շատ պրոֆեսիոնալ: Այստեղ, կներեք, սուբյեկտիվ կլինի, որ ի սկզբանե որեւէ մեկը կարծիք հայտնի: