Ինչպես երեկ էինք տեղեկացրել, Ստամբուլում կայացած Տնտեսական համագործակցության կազմակերպության գագաթնաժողովի շրջանակներում Թուրքիայի նախագահ Աբդուլլահ Գյուլը անդրադրաձել էր ղարաբաղյան հիմնախնդրին՝ շեշտելով. «…ադրբեջանական գրավյալ տարածքները պետք է ազատագրվեն հայկական օկուպացիայից»: Գագաթնաժողովի շրջանակներում կազմակերպված մամուլի ասուլիսի ժամանակ Թուրքիայի նախագահը պատասխանել է լրագրողների հարցերին: «Zaman»-ը հայտնում է, որ ադրբեջանցի մի լրագրող հարց է ուղղել նրան. «Կցանկանա°ք այստեղից կոչով դիմել Հայաստանին»: Ի պատասխան՝ Գյուլը հայտարարել է. «Այդ առնչությամբ մենք շարունակաբար կոչեր հնչեցնում ենք: Օրինակ` Սևծովյան տնտեսական համագործակցությունում Հայաստանն էլ է հրավիրված: Անդամակցում է»: Կարևորելով տարածաշրջանային կայունությունն ու համագործակցությունը` Թուրքիայի նախագահը նաև ասել է. «Այդ իսկ պատճառով մենք մեծ նշանակություն ենք տալիս Հայաստանի հետ դրացիական հարաբերությունների կարգավորմանը: Այդ ուղղությամբ քայլեր կատարվել են: Հուսով ենք, որ փոխադարձ աշխատանքների արդյունքում այդ դժվար հարցերը կլուծվեն, և, ի վերջո, Կովկասում խաղաղություն ու կայունություն կունենանք»: Թուրքիայի նախագահը ընդգծել է, որ դրան հասնելու համար հարկավոր է վերջ դնել ադրբեջական հողերի «օկուպացիային»: Գյուլի խոսքով` այդ հիմնախնդրի հետևանքով 1 մլն փախստական կա, ու այդ հանգամանքը պետք է հաշվի առնվի:
Ի դեպ, Ա.Գյուլը բարձր է գնահատել Օբամայի ու Քլինթոնի ջանքերը Հայոց ցեղասպանության բանաձևի դեմ` պատասխանելով նաև Հայոց ցեղասպանության բանաձևին առնչվող հարցերին: «Թուրք-ամերիկյան հարաբերությունները այդ խնդրի պատճառով անտեղի կարող էին վնաս կրել: Դա կանխվեց: Հստակ երևաց, թե Օբամայի վարչակազմը որքան կարևորություն է տալիս թուրք-ամերիկյան հարաբերություններին: Տարածաշրջանային և համաշխարհային մի շարք հարցերում առկա կարևոր ու սերտ համագործակցությունը կարող էր խաթարվել: Բայց Վաշինգտոնում դա գիտակցեցին և անհրաժեշտ ջանքեր գործադրելով` կանխեցին»,- ընդգծել է Գյուլը:
