Դերասան Երվանդ Մանարյանը, ամփոփելով 2011-ը, նշեց, որ ձախողումներ եղել են ու կլինեն, բայց հարցն այն է, որ մեզանում օրենքները չեն աշխատում, ինչը դերասանը ամենամեծ բացն է համարում:
«Մյուս բոլոր խնդիրները կուղղվեն, եթե օրենքները աշխատեն», -նշեց Երվանդ Մանարյանը` ավելացնելով, որ պետությունը պետք է դառնա իրականություն, ուրիշ ոչ մի բան մեզ պետք չէ, քանի որ, նրա խոսքերով, մենք խելացի ժողովուրդ ենք, մենք կարողանում ենք մեր հարցերը կարգավորել:
2012-ին Երվանդ Մանարյանը ժողովրդին բարեկեցություն է ցանկանում, բացի այդ, ժողովուրդը իր իրավունքները ոչ թե պետք է ակնկալի ինչ-որ մեկից, այլ ինքը իր իրավունքներին իսկական տեր լինի, որ երբ դրանք խախտվում են, կարողանա դրանց դեմն առնել, խախտողներին կանգնեցնել:
Այս առումով`դերասանը զգալի փոփոխություններ նկատել է.«Մեր հասարակությունը հասնում է նրան, որ այն, ինչ մենք ակնկալում ենք, կախված է մեզնից: Մենք պետք է մեր իրավունքների տերը լինենք, և դուրս գանք, եթե անհրաժեշտություն առաջանա: Մեզ ոչ մի բան պետք չէ ո՛չ հարևաններից, ո՛չ գերտերություններից, մենք ոչ մեկից մեծ ակնկալիք չպետք է ունենանք, մեր թերությունները նախ մեզանում կիսվենք և գնանք ուղղենք»,-եզրափակեց Երվանդ Մանարյանը:
