2011 թ. ամերիկյան վարձույթի վիճակագրությունը ցույց է տալիս, որ կինոարտադրությունում գաղափարների ճգնաժամ է առաջացել: Անցնող տարվա ամենահայտնի ֆիլմերը կամ նախորդների շարունակությունն են, կամ նույն ֆիլմի վերանկարահանումները, կամ կոմիքսների էկրանավորում:
Ինչպես հաղորդում է The New York Times պարբերականը, դա ցույց է տալիս, որ ռեժիսորները և կինոստուդիաները պատրաստ չեն ռիսկի դիմել նոր սցենարների և նոր կերպարների համար: «Մենք պետք է նորից բացենք այդ բիզնեսը մեզ համար,- մեկնաբանում է ստեղծված իրավիճակը պրոդյուսեր Ջոն Դևիսը,- այժմ ոչ ոք չի ցանկանում ռիսկի դիմել»:
Ստուդիաները ենթադրում են, որ առավել անվտանգ է նկարահանել արդեն մեծ գնահատականի արժանացած ֆիլմերի նմանօրինակները, չնայած փորձը ցույց է տալիս, որ սկզբունքորեն նոր սյուժեները, եթե նրանք բացառիկ և հետաքրքիր են, նույնպես կարող են մեծ եկամուտներ բերել:
Այնուամենայնիվ, ամենաեկամտաբեր ֆիլմերի յոթնյակը կազմում են սիքվելները. «Հարի Փոթերը և մահվան պարգևները. մաս 2», «Տրանսֆորմերներ-3. Լուսնի մութ կողմը» , «Մթնշաղ: Սագա: Լուսաբաց. մաս 1», «Խումհար. մաս 2», «Կարիբյան ծովի ծովահենները. Օտար ափերում», «Մեքենաներ-2», «Ֆորսաժ-5»:
Տասնյակը եզրափակում են երկու կինոկոմիքս՝ «Տոր» և «Առաջին վրիժառուն» և 1970-ականներին հայտնի «Կապիկների մոլորակը» ֆիլմի վերանկարահանումը:
