EurasiaNet-ի փոխանցմամբ՝ վաշինգտոնցի անկախ լրագրող, Կենտրոնական Ասիայի, Կովկասի և Մերձավոր Արևելքի անվտանգության հարցերով մասնագետ, The Bug Pit բլոգի հեղինակ Ջոշուա Կուչերան, հենվելով մի շարք փորձագետների կարծիքների վրա, կազմել է 2012 թվականի ամենահավանական պատերազմների ցուցակը։
Այդ ցանկը գլխավորել է Լեռնային Ղարաբաղի համար Հայաստանի ու Ադրբեջանի միջև պատեազմը։ Այս կապակցությամբ նշված է. «Սա հենց այն տեղն է, ուր ամենահավանականն է համարվում առաջիկա 10 տարիներին պատերազմի առաջացումը։ Թեպետ ներկայումս Ադրբեջանի հարձակումը թվում է քիչ հավանական, սակայն այստեղ մշտապես պահպանվում է սխալ հաշվարկ անելու կամ սադրանքի գնալու հնարավորությունը»։
Երկրորդ տեղում Տաջիկստանում հնարավոր քաղաքացիական պատերազմն է, իսկ երրորդ տեղում՝ Ուզբեկստանի սադրանքը Տաջիկստանի կամ Ղրղզստանի նկատմամբ։
Մյուս հավանական պատերազմների թվում նշվում են Աբխազիայի և Հարավային Օսիայի համար Վրաստանի ու Ռուսաստանի միջև պատերազմը, քաղաքացիական պատերազմը Ղրղզստանում, Կասպից ծովի նավթագազային պաշարների համար ռազմածովային հակամարտությունը, Իրանի ու Ադրբեջանի միջև զինված գործողությունները, Ուզբեկստանում իսլամիստների ակտիվացումը, Իրանին ռազմական հարված հասցնելը՝ Կովկասի համար անկանխատեսելի հետևանքներով հանդերձ։
Ամփոփման մեջ նշված է, որ այս ամենը չի նշանակում, թե 2012 թվականին վերոնշյալ վայրերում պատերազմների հավանականությունն իսկապես բարձր է։ Անգամ այդ ցանկը գլխավորող Ղարաբաղյան պատերազմի սկսման հավանականությունը չի գերազանցում 5 տոկոսը, իսկ մնացած դեպքերում այն կազմում է 1 տոկոս։
Մյուս կողմից էլ նշվում է, որ եթե իսկապես 2012 թվականին որևէ պատերազմ ծագի, ապա զարմանալի կլինի, եթե այն տեղի ունենա մեկ այլ վայրում, որը ներառված չէ այս ցանկում։
