Լոս Անջելեսի, Սան Ֆրանցիսկոյի, Նյու Յորքի և Բոստոնի կինոքննադատները և Ամերիկյան կինոյի ինստիտուտը ընտրել են 2011 թ. լավագույն ֆիլմերը:
Ինչպես հաղորդում է OpenSpace-ը, ի տարբերություն անցյալ տարվա, երբ բոլոր դափնիները ստացավ «Սոցիալական ցանց» ֆիլմը, այս տարի ամերիկացի քննադատներն ընտրել են երեք տարբեր ֆիլմ:
Այսպես, Լոս Անջելեսի կինոքննադատների ակադեմիան տարվա ֆիլմ է ճանաչել Ալեքսանդր Պեյնի «Ժառանգներ» (The Descendants) ֆիլմը, երկրորդ տեղում է «Կենաց ծառը» (The Tree of Life), ընդ որում՝ ֆիլմի ռեժիսոր Տերրենս Մալիքը ճանաչվել է լավագույն ռեժիսոր:
Լոս Անջելեսի իրենց գործընկերների հետ համաձայնել են Սան Ֆրանցիսկոյի կինոքննադատները. նրանք տարվա ֆիլմ են ընտրել «Կենաց ծառը», իսկ տարվա ռեժիսոր Տերրենս Մալիքին:
Կալիֆոռնիական երկու ասոցիացիաների կարծիքները համընկել են 2011 թ. լավագույն մուլտֆիլմի հարցում, որը դարձել է «Ռանգոն» (Rango):
Բոստոնի կինոքննադատները տարվա ֆիլմ են ճանաչել ֆրանսիացի Միշել Խազանավիչուսի «Արտիստ» (The Artist) սև-սպիտակ ֆիլմը: Լավագույն ռեժիսոր ճանաչվել է Մարտին Սկորսեզեն:
Նյու Յորքի կինոքննադատները նույնպես կատարել են իրենց ընտրությունը՝ տարվա լավագույն ֆիլմ ճանաչելով «Արտիստը», իսկ լավագույն ռեժիսոր՝ նրա հեղինակ Միշել Խազանավիչուսին:
Ամերիկյան կինոյի ինստիտուտը անցնող տարվա լավագույն ֆիլմեր է ճանաչել «Հարսնացուի ընկերուհիներ», «Ժառանգներ» և «Վիշապի դաջվածքով աղջիկը» ֆիլմերը:
Բացի այդ, հատուկ մրցանակներ են շնորհվել «Արտիստ» ֆիլմին և Հարի Փոթերի մասին պատմող ֆիլմաշարին:
