Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ Երևանի դպրոցների Պարենի համաշխարհային ծրագրի «Դպրոցական սնունդ» ծրագրում հնարավոր ընդգրկմանն առնչվող հարցեր են քննարկվել Երևանի քաղաքապետի տեղակալ Վանո Վարդանյանի և ՄԱԿ–ի Պարենի համաշխարհային ծրագրի հայաստանյան գրասենյակի պատվիրակության հետ հանդիպման ժամանակ։
Վ. Վարդանյանը նշել է, որ քաղաքապետարանը հետաքրքրված է ծրագրով և պատրաստ է այն կիրառել նաև Երևանում։
Հյուրերը, ներկայացնելով ծրագրի ռազմավարությունն ու իրականացման հիմնական մեխանիզմները, նշել են, որ այն հաջողությամբ կիրառվում է աշխարհի 70 երկրներում և շուրջ 20 միլիոն դպրոցական է օգտվում ծրագրից:
Կողմերը պայմանավորվել են ստեղծել աշխատանքային խումբ, որը, ուսումնասիրելով շուկան և առկա հնարավորությունները, եռամսյա ժամկետում կկազմի մայրաքաղաքում «Դպրոցական սնունդ» ծրագրի ներդրման հայեցակարգ, որի հիման վրա էլ կկազմվի աշխատանքային ծրագիր։
