Թերթին տված հարցազրույցում Թեհրանում Թուրքիայի տնտեսական կցորդը հայտարարել է, որ Իրանի և Թուրքիայի միջև տարեկան առևտրային շրջանառությունը հասել է 7,5 մլրդ դոլարի: Սա աննախադեպ ցուցանիշ է երկկողմ հարաբերություններում: Fars news գործակալությունը փոխանցում է` թուրք պաշտոնյան այս մասին ասել է Իրանի առևտրային պալատում թուրք-մուսուլման գործարարների և իրանցի առևտրականների միջև տեղի ունեցած հանդիպման ժամանակ: Նա նշել է նաև, որ մինչև 2015թ. Իրանն ու Թուրքիան նախատեսում են այդ թիվը հասցնել տարեկան 30 մլրդ դոլարի:
Ավելի վաղ երկու երկրների առևտրային պալատների ղեկավարները` Իրանի առևտրային պալատի ղեկավար Մոհամադ Նահավադյանը և Թուրքական պալատների և առևտրային բորսաների միության նախագահ Ռիֆաթ Հիսաջիկլիօղլուն, պայմանագիր են ստորագրել ընկերությունների միջև առևտուրն խթանելու վերաբերյալ:
Իրանցի պաշտոնայները նաև հայտարարել են, որ ցանկանում են Պարսից ծոցի նավահանգիստների իրենց ապրանքները դեպի արևմուտք արտահանել թուրքական` միջերկրածովյան և սևծովյան նավահանգիստներով: