Ստամբուլում հրատարակվող «Ժամանակ» օրաթերթի գլխավոր խմբագիր Արա Գոչունյանը, անդրադառնալով օրերս Ստամբուլում «Մենք ենք ուզում ընտրել մեր պատրիարքին» նախաձեռնության կազմակերպած մամուլի ասուլիսին և համատեղ կոչին, նշել է, որ նախաձեռնության մասնակից չէ, բայց հետևում է նրանց գործունեությանը: Նրա խոսքերով` պատրիարքի ընտրության գործընթացի ձգձգումը համատարած անհանգստություն է առաջացնում Ստամբուլի հայկական համայնքի ներսում, և ցանկացած այդ տիպի նախաձեռնություն արագ արձագանք է գտնում համայնքի կողմից՝ ստեղծված ճգնաժամից դուրս գալու համար: Արամ Աթեշյանի հանդեպ համայնքի բացասական տրամադրվածության պատասխանը նա նույնպես չունի. «Նախաձեռնությունները կարծես ամբոխավարական ձևով են գործում, բայց նկատի ունենալով, որ գործընթացը հունից աստիճանաբար դուրս է գալիս, տարակարծություններ ունենալով հանդերձ՝ չենք կարող չնկատել մարդկանց անկեղծությունը. Բոլորն էլ ցանկանում են, որ պատրիարքական ընտրությունը կայանա»,- նկատել է Արա Գոչունյանը`ավելացնելով, սակայն, որ Թուրքիայի կառավարությունը այս հարցում կոմպրոմիսի չի գնա, քանի որ վերջինս շատ լավ գիտի` թրքահայությունը ի՞նչ է ցանկանում և ի՞նչ պատկերացումներ ունի լուծման հեռանկարի մասին։ Հենց դա է պատճառը, որ կառավարությունը միջանկյալ լուծում է առաջարկում համայնքին, արդեն վերահաստատել է, որ ինքը հարգում է Թուրքիայի հայության իրավունքները, բայց այսօրվա դրությամբ թրքահայությունը չի իմանում` կոնկրետ ի՞նչ պահանջի Թուրքիայի կառավարությունից։ Եվ մինչև համայնքը վերջանական որոշում չկայացնի, կառավարությունից ոչ մի բան պետք չէ ակնկալել: Ըստ նրա` փակուղուց, ճգնաժամից դուրս գալու համար պետք է ինչ-որ քայլեր անել:
