Ռոսպոտրեբնադզորը հայտարարել է, որ ռուսական շուկայում հայտնաբերել է անորակ հայկական գինիներ և կոնյակներ և հրահանգել է հետ կանչել դրանք։ Ավելի վաղ Ռուսաստանի իշխանությունները սահմանափակել էին ծաղիկների և Ջերմուկ հանքային ջրի ներմուծումը Հայաստանից, գրում է РБК-ն։
Ռոսպոտրեբնադզորը (Սպառողների իրավունքների պաշտպանության և մարդու բարեկեցության վերահսկողության դաշնային ծառայությունը) հայտնաբերել է Հայաստանից ալկոհոլային խմիչքներ, որոնք չեն համապատասխանում պարտադիր պահանջներին և հրամայել է կասեցնել դրանց վաճառքը Ռուսաստանում։ Այս մասին հաղորդվել է գործակալության կայքում։
Սահմանափակումները վերաբերում են երեք հայկական արտադրողների՝ VEDI-ALCO-ի, Աբովյանի կոնյակի գործարանի և Շահնազարյանի գինու և կոնյակի տան արտադրանքին։
Մասնավորապես, դրանց թվում են ARNI Legends շարքի Գետափ Վերնաշենի կարմիր կիսաքաղցր գինին և Vedi Alco չոր սպիտակ գինին, որոնք երկուսն էլ արտադրվում են VEDI-ALCO-ի կողմից։ Ցանկում են նաև Աբովյանի կոնյակի գործարանի կողմից արտադրված «Հայկական կոնյակ 5 աստղ» և Շահնազարյանի գինու և կոնյակի տան կողմից արտադրված յոթ տարեկան «Շահնազարյան XO» կոնյակները։
Գործակալությունը չի նշել, թե կոնկրետ որ պահանջներին չեն համապատասխանում արտադրանքները։ Հրատարակության տվյալներով՝ վաճառքի կասեցման և ալկոհոլը շրջանառությունից հանելու անհրաժեշտության մասին տեղեկատվությունն ուղարկվել է ներմուծողներին և մանրածախ առևտրականներին։ Ռոսպոտրեբնադզորը հայտարարել է, որ իրավիճակը գտնվում է իր վերահսկողության տակ։
