Փետրվարի 6-ին Մոսկվայի Վոլոկոլամսկի խճուղու բազմաբնակարան շենքերից մեկի 24-րդ հարկում անհայտ անձը մի քանի կրակոց է արձակել գեներալ-լեյտենանտ Վլադիմիր Ալեքսեևի թիկունքին և դեպքի վայրից հեռացել: ՌԴ Քննչական կոմիտեի ներկայացուցիչ Սվետլանա Պետրենկոն հաստատել է այդ տեղեկությունը և ասել, որ «մահափորձի հատկանիշներով քրեական գործ է հարուցվել»: Ըստ տեղեկությունների, գեներալ Ալեքսևը «ծանր վիճակում հոսպիտալացվել է Մոսկվայի հիվանդանոցներից մեկում»: Քննիչները և քրեագետները «տեղում ուսումնասիրում են տեսախցիկների տեսագրությունները, հանցագործության մեջ կասկածվողի ինքնությունը դեռևս պարզված չէ»:
Ուշագրավ է, որ մինչ ՌԴ Քննչական կոմիտեն գեներալ-լեյտենանտ Ալեքսեևին ներկայացրել է որպես «պաշտպանության նախարարության բարձրաստիճան պաշտոնյա», արևմտյան լրատվամիջոցները եւ ուկրաինացի բլոգերները «պարզել են», որ նա հանդիսանում է ՌԴ ԶՈՒ ԳՇ Հետախուզական գլխավոր վարչության պետի առաջին տեղակալը: Ըստ այդ աղբյուրների, գեներալ Ալեքսեևը ավելի քան մեկ տասնամյակ «վերահսկել է «Վագներ» մասնավոր ռազմական խմբավորումը», իսկ վերջին շրջանում «զբաղվել է նոր մասնավոր ռազմական կազմավորում ստեղծելու հարցերով»:
«Դոյչե վելլեի» ռուսական ծառայությունը հատուկ ուշադրություն է հրավիրել իրողության վրա, որ Աբու-Դաբիում ռուս-ամերիկա-ուկրաինական «խորհրդատվություններում» Ռուսաստանի պատվիրակությունը գլխավորել է ԳՇ Հետախուզության գլխավոր վարչության պետ ծովակալ Կոստյուկովը: Որևէ կապ կա՞ Աբու-Դաբիի բանակցությունների և գեներալ-լեյտենանտ Ալեքսեևի դեմ մահափորձի միջև, միայն ենթադրել կարելի է:
Ամեն դեպքում ՌԴ ԳՇ Հետախուզության գլխավոր վարչության պետի տեղակալի դեմ մահափորձը չափազանց ռեզոնասային է, որպեսզի քաղաքական հետևանքներ չունենա: Ուկրաինայի հետ պատերազմի անցած չորս տարիներին Ռուսաստանը մի քանի բարձրաստիճան զինվորականներ է կորցրել, այդ թվում՝ մայրաքաղաք Մոսկվայում նրանց դեմ մահափորձի հետևանքով: Դա ՌԴ –ի համար վարկանիշային լուրջ կորուստ է: Ավելի վաղ ռուսաստանյան որոշ աղբյուրներ ակնարկել են Անվտանգության դաշնային ծառայության տնօրեն Բորտնիկովի «մոտալուտ պաշտոնանկության» մասին:
