Թողնում ենք ետևում բուռն իրադարձություններով լի մի տարի, երբ ականատեսը եղանք Հայաստանի և ամբողջ տարածաշրջանի համար հուսադրող զարգացումների, իսկ Միջին Արևելքում՝ տակավ շարունակվող տագնապալի իրավիճակի ու մարդկային տառապանքների:
Անտարակույս, 2025 թվականի ամենահատկանշական ձեռքբերումը եղավ Օգոստոս 8-ին ԱՄՆ-ի մայրաքաղաք Վաշինգթոնում ստորագրված Հայաստան-Ադրբեջան-ԱՄՆ համատեղ հռչակագիրը, ինչպես նաև Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի նախաստորագրումը, որոնց շնորհիվ տարածաշրջանում կայուն խաղաղության, տնտեսական համագործակցության և բարգավաճման մի նոր էջ բացվեց։
Բացի այդ, Հայաստան-Եվրոպական Միություն ռազմավարական և տնտեսական հարաբերությունների խորացումը ոչ միայն ճանապարհ է հարթում դեպի եվրոպական նոր ու այլընտրանքային շուկաներ, այլև Հայաստանի համար ստեղծում է Եվրոպական Միության անդամակցելու իրատեսական հեռանկար:
Հակառակ հուսադրող զարգացումներին, դեռևս լուրջ և անհետաձգելի խնդիր է մնում Ադրբեջանական բանտերում կալանավորված հայ գերիների հարցը, Լեռնային Ղարաբաղից բռնագաղթված հայերի իրավունքների վերականգնումը և Արցախի տարածքում մնացած հայկական պատմամշակութային ժառանգության պահպանումը։
Մյուս կողմից, Միջին Արևելքը շարունակում է մնալ աշխարհի ամենապայթյունավտանգ տարածաշրջանը: Հակառակ զինադադարին ու գերիների փոխանակման համաձայնությանը, Գազայի հատվածի բնակչությունը շարունակում է ապրել դաժան պայմաններում՝ իսրայելյան բանակի տևական սպառնալիքի ներքո:
Զուգահեռաբար, Լիբանանի հարավը ենթարկվում է իսրայելյան օդուժի ամենօրյա թիրախավորմանը՝ արդեն իսկ հյուծված Լիբանանը դնելով ավելի ծանր քաղաքական, սոցիալական և տնտեսական ճնշումների տակ։ Իսկ Սիրիայի նոր իշխանությունները փորձում են մի կողմից պահել երկրին միասնականությունը, իսկ մյուս կողմից ապահովել քաղաքացիների տարրական կենցաղային պայմանները:
Բնականաբար, այս անկայուն և անորոշ իրավիճակը իր բացասական ազդեցությունն է ունենում շրջանի հայության սոցիալական և տնտեսական կյանքի վրա: Մեր մաղթանքն է, որ 2026 թվականը Միջին Արևելքին բերի կայուն ու հարատև խաղաղություն, որպեսզի ժողովուրդները կարողանան ապրել և ստեղծագործել իրենց բնօրրաններում:
Նոր տարին դիմավորում ենք լավատեսությամբ և այն հույսով, որ 2026 թվականը Հայաստանի արդի պատմության մեջ կդառնա անկյունաքարային տարի՝ երկարատև խաղաղության հաստատումով և տնտեսական ու սոցիալական վերելքով։
Շնորհավոր Նոր Տարի և Սուրբ Ծնունդ։
Սոցիալ Դեմոկրատ Հնչակյան Կուսակցության
Կենտրոնական Վարչություն
01/01/2026
