ՊԵԿ նախագահ Էդուարդ Հակոբյանը շնորհավորական ուղերձ է հղել Ամանորի և Սուրբ Ծննդյան տոների կապակցությամբ:
«Հարգելի՛ գործընկերներ, սիրելի՛ հարկ վճարողներ,
Շնորհավորում եմ ձեզ Ամանորի և Սուրբ Ծննդյան տոների կապակցությամբ:
Երախտագիտություն եմ հայտնում հարկ վճարողներին՝ 2025 թվականին դրսևորած հարկային կարգապահության, հոգատարության և բարեխղճության համար, ինչպես նաև Պետական եկամուտների կոմիտեի ողջ անձնակազմին՝ նվիրված և պատասխանատու աշխատանքի համար։
Անցնող տարին ևս մեկ անգամ հաստատեց հարկային և մաքսային ծառայությունների առանցքային դերը պետության առաջանցիկ զարգացման, տնտեսական անվտանգության և հասարակության ու հարկ վճարողների արդար սպասելիքների ապահովման գործում։
2025 թվականին ամենօրյա հետևողական աշխատանքի արդյունքում կարողացել ենք ամրապնդել հարկ վճարող–ՊԵԿ-պետություն փոխվստահությունը, ապահովել եկամուտների բարձր երկնիշ աճ և զգալիորեն կրճատել ստվերային տնտեսությունը։
2026 թվականին մենք շարունակելու ենք բարեփոխումների գործընթացը՝ առաջնահերթ համարելով վարչարարության կատարելագործումը, թվային լուծումների և արհեստական բանականության գործիքների կիրառման ընդլայնումը, ինչպես նաև վերլուծական կարողությունների զարգացումը։ Առաջիկայում ավելի կբարելավենք քաղաքացիներին մատուցվող ծառայությունների որակը, կկրճատենք գործընթացների ժամանակատարությունը:
Մեզ համար կարևոր է ձևավորել մարդակենտրոն համակարգ և խորացնել հարկ վճարողի հետ ազնիվ, թափանցիկ ու գործընկերային հարաբերությունները։ Միաժամանակ կարևոր է պահպանել հարկերի վճարման բարձր աճի տեմպերը։
2026-ին մեր գործունեության առանցքային թիրախներից կշարունակի լինել կոռուպցիայի դեմ անզիջում պայքարը։ Պետք է հետևողականորեն և վճռականորեն գործենք այս ուղղությամբ՝ պահպանելով համակարգի անաղարտությունը և յուրաքանչյուր աշխատակցի պատասխանատվության բարձր մակարդակը։ Այդ չարիքի հաղթահարումը մեր հետագա հաջողությունների կարևոր նախապայմաններից է։
2026-ը մեր պետության համար բեկումնային տարի է լինելու՝ հագեցած հարկային ռեֆորմներով, Խաղաղության օրակարգից և խաչմերուկ ու լոգիստիկ հանգույց դառնալու ջանքերից բխող մաքսային ենթակառուցվածքների ձևավորման ու մաքսային ծառայության մեծ քայլերով: Համոզված եմ, որ ՊԵԿ-ն ունի այդ ռեֆորմներին և վերափոխումներին աջակցելու և որոշ դեպքերում առաջնորդելու մեծ ներուժ:
Վստահ եմ, որ համատեղ աշխատանքի շնորհիվ 2026 թվականը կլինի հերթական թռիչքի, համարձակ նորարարությունների, մարդակենտրոն մոտեցման խորացման, հասարակության ու պետության առավել ամրապնդված վստահության տարի։
Թող գալիք տարին ձեզ և ձեր ընտանիքներին պարգևի խաղաղություն, առողջություն և բարեկեցություն։ Համոզված եմ շատերդ վերագտել եք հարկ վճարելու առաքելությունը և կշարունակեք դրանով վարակել մյուսներին։
Շնորհավոր Ամանոր և Սուրբ Ծնունդ»,- ասված է ուղերձում։
