Պակիստանի նախկին վարչապետ Իմրան Խանը և նրա կինը դատապարտվել են լրացուցիչ 17 տարվա ազատազրկման։ Ինչպես տեղեկացնում է BBC-ին, Խանը մեղադրանքները որակել է որպես քաղաքական դրդապատճառներով առաջադրված՝ ընդգծելով, որ դրանք հաջորդել են խորհրդարանում անվստահության քվեի արդյունքում իր պաշտոնանկությանը 2022 թվականի մարտին։
Խանի խոսքով՝ իր հեռացումը վարչապետի պաշտոնից տեղի է ունեցել այն բանից մոտ մեկ ամիս անց, երբ Պակիստանի պաշտոնյաները հանդիպում են ունեցել ԱՄՆ Պետդեպարտամենտի ներկայացուցիչ Դոնալդ Լուի հետ։
Ամերիկյան The Intercept-ի ձեռք բերած գաղտնի փաստաթղթերի համաձայն՝ ամերիկացի պաշտոնյան Պակիստանի իշխանություններին կոչ է արել հեռացնել Իմրան Խանին վարչապետի պաշտոնից՝ ռուս-ուկրաինական պատերազմի հարցում նրա չեզոք դիրքորոշման պատճառով։
Նյութում նշվում է նաև, որ Պակիստանի զինված ուժերը, թեև վերջին տարիներին բարելավել են հարաբերությունները Միացյալ Նահանգների հետ, էական դեր են խաղացել Խանի իշխանությունից հանկարծակի հեռացման գործընթացում։
