Գազայի առողջապահության նախարարությունը հայտնել է, որ անկլավում հոկտեմբերի 10-ին հաստատված հրադադարից ի վեր զոհվել է 394 և վիրավորվել՝ 1075 պաղեստինցի։
Այս մասին հայտնում է Al Jazeera-ն։
Գազայի հատվածի քաղաքացիական պաշտպանությունը դեկտեմբերի 17-ին հայտարարել է, որ չորս երեխա է մահացել ցրտից, իսկ 13 մարդ զոհվել է բնակելի շենքերի փլուզման հետևանքով։ Տեղեկությունների համաձայն՝ առնվազն 17 բնակելի շենք ամբողջությամբ և 90-ը՝ մասամբ փլուզվել է անկլավում ուժգին անձրևների և քամիների հետևանքով։ Ապաստարանների մոտ 90%-ն ամբողջությամբ հեղեղվել է տեղատարափ անձրևների պատճառով։ Հազարավոր ընտանիքներ մնացել են առանց ժամանակավոր կացարանի:
Պաղեստինյան Wafa լրատվական գործակալության տեղեկացմամբ՝ իսրայելական զինվորականները կրակ են բացել Արևմտյան ափի Նաբլուս քաղաքի վրա, որի հետևանքով վիրավորվել են չորս պաղեստինցիներ։ Հարձակումների են ենթարկվել նաև Արևմտյան ափի այլ բնակավայրեր։
Գազայի առողջապահության նախարարությունը տեղեկացրել է, որ 2023 թվականի հոկտեմբերի 7-ից վեր իսրայելական հարձակումների հետևանքով զոհված պաղեստինցիների թիվը հասել է 70668 -ի, վիրավորվել է 171152 մարդ։
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
Կողմերն ԱՄՆ նախագահ Դոնալդ Թրամփի միջնորդությամբ հասել են հրադադարի, ՀԱՄԱՍ-ը վերադարձրել է իր մոտ պահվող իսրայելցի պատանդներին և զոհված գրեթե բոլոր պատանդների աճյունները։
