Իրաքի առասպելական Տիգրիս գետը, որը հազարամյակներ շարունակ կերակրել է Միջագետքի քաղաքակրթությունները, այսօր գտնվում է քայքայման փուլում։ The Telegraph-ը անդրադարձել է գետի շուրջ տեղի ունեցող բացասական վիճակագրությանը։
Վերջին երեք տասնամյակում գետը կորցրել է իր ծավալի մեծ մասը։ Թուրքիայի ամբարտակների շնորհիվ Բաղդադ հասնող ջրի քանակը կրճատվել է 33%-ով, իսկ Իրաքում տեղումների քանակը նվազել է 30%-ով։ Երկիրը ապրում է գրեթե մեկ դար ամենասաստիկ երաշտը, և կանխատեսվում է, որ 2035 թվականին քաղցրահամ ջրի պահանջարկը կգերազանցի առաջարկը։ Այս ամառ գետը այնքան ցածր է եղել, որ մարդիկ կարողացել են այն ոտքով հատել։
Աղտոտման իրավիճակը ոչ պակաս սարսափելի է։ 1991 թվականի «Անապատի փոթորիկ» օպերացիայից հետո Իրաքի ջրմաքրման ենթակառուցվածքները ոչնչացվել են և երբեք ամբողջությամբ չի վերականգնվել։ Այսօր հարավում և կենտրոնում միայն 30% քաղաքային տնային տնտեսություններն են միացված կոյուղատար համակարգին, իսկ գյուղական տարածքներում այդ թիվը կազմում է ընդամենը 1.7%։ 2018-ին Բասրայում 118,000 մարդ հոսպիտալացվել է աղտոտված ջուր օգտագործելուց հետո։ 2022 թվականի հետազոտությունը ցույց է տվել, որ Բաղդադում բազմաթիվ կետերում ջրի որակը գնահատվել է որպես «վատ» կամ «շատ վատ»։
Իրավիճակը դառնում է ավելի վատ, քանի որ երկու խնդիրները փոխադարձաբար ուժեղացնում են միմյանց։ Ինչպես բացատրում են փորձագետները՝ ջրի որակը կախված է քանակից։ Երբ գետի ծավալը նվազում է, աղտոտիչների կոնցենտրացիան աճում է։
Տիգրիսի ավազանում ապրում է մոտ 18 միլիոն իրաքցի։ Գետը ապահովում է ոռոգում, տրանսպորտ, արդյունաբերություն, էներգիա և խմելու ջուր։
Թվերը հստակ են՝ Տիգրիսը մահանում է, և եթե հիմա արագ գործողություններ չձեռնարկվեն, հնագույն քաղաքակրթությունների այս օրրանը կարող է վերածվել անապատի։
