Թուրքական Zaman թերթի փոխանցմամբ՝ Թուրքիայի Ազգային մեծ ժողովը (ԹԱՄԺ) վաղը դիտարկելու է անդրսահմանային օպերացիաների անցկացման ժամկետը մեկ տարով երկարաձգելու հարցը։ Այդ ժամկետը սպառվում է հոկտեմբերի 17-ին։
Նշվում է, որ, 1950 թվականից ի վեր, ԹԱՄԺ-ը 32 անգամ կառավարությանն արտոնել է երկրի սահմաններից դուրս ռազմական գործողություններ իրականացնել։ Վաղը ԹԱՄԺ-ում կարող է գրանցվել 33-րդ դեպքը։
Առաջին անգամ այդ հարցը ԹԱՄԺ-ում քննարկվել է 1950 թվականի դեկտեմբերի 6-ին, երբ նա արտոնեց թուրք զինծառայողների մասնակցությունը ՄԱԿ-ի խաղաղապահ գործողություններում։ Հաջորդ դեպքերը վերաբերում են Կիպրոսին, Պարսից ծոցին, Հյուսիսային Իրաքին, Աֆղանստանին, Բոսնիա-Հերցեգովինային, Կոսովոյին, Մերձավոր Արևելքին, ծովահենությանը և այլն։
Հիշեցնենք, որ անդրսահմանային օպերացիաներ անցկացնելու թուրքական կառավարության լիազորության ժամկետի երկարաձգման մասին որոշումը, որի վրա առկա է Թուրքիայի վարչապետ Էրդողանի ստորագրությունը, օրեր առաջ է ներկայացվել ԹԱՄԺ-ի հաստատմանը։
Որոշման մեջ նշված է, որ Հյուսիսային Իրաքում շարունակվում են ահաբեկչությունները, և առկա է այնտեղ բազավորված Քրդստանի աշխատավորական կուսակցությունից (PKK) բխող ուղղակի վտանգը։ Բացի այդ, նշված է, որ Թուրքիան միջազգային նորմերին համապատասխան իրավասու է զինված ուժերի միջոցով հակաահաբեկչական գործողություններ իրականացնել իր սահմաններից դուրս։
Այժմ ԹԱՄԺ-ից պահանջվում է՝ հոկտեմբերի 17-ից սկսած՝ մեկ տարով երկարաձգել անդրսահմանային օպերացիաներ անցկացնելու թուրքական կառավարության լիազորության ժամկետը, քանի որ այդ մասին որոշումն առաջին անգամ ընդունվել է 2007 թվականի հոկտեմբերի 17-ին։ Ներկայումս Թուրքիան և Իրանը պլանավորել են համատեղ ցամաքային գործողություն իրականացնել Հյուսիսային Իրաքում բազավորված քուրդ զինյալների դեմ։
