Fox News հեռուստաընկերության լրագրող Բրեթ Բեյերը հանրայնացրել է տեղեկություն, թե ԱՄՆ նախագահ Դոնալդ Թրամփը մասնավոր մակարդակում արտահայտվել է, որ կարող է Իրանում վերստին բացել ԱՄՆ դեսպանատուն: Արդյո՞ք լրագրողի միջոցով Թրամփի թիմը փորձում է շոշափել հանրային կամ քաղաքական շրջանակների տրամադրություններ: Միարժեք բարդ է ասել, սակայն տեղեկությունը ուշադրության է արժանի հատկապես այն տեսակետի ֆոնին, որ արտահայտել էր Թրամփի առանցքային թիմակից Իլոն Մասկը, որը իր վերջին հարցազրույցներից մեկում հայտարարել էր, որ Իրանը շատ լավ տեղ է ներդրումների համար:
Թրամփի ընտրությունից հետո Իրանի հանդեպ նրա վերաբերմունքը դարձել է առանցքային դիլեմաներից մեկը միջազգային հարաբերությունների վերաբերյալ դիտարկումներում՝ Թրամփը պատերազմ կսկսի՞ Իրանի դեմ, թե՞ ոչ: Իհարկե, այդ դիլեման բավականին հեռու է ռացիոնալությունից, որովհետեւ Իրանի դեմ պատերազմն ԱՄՆ համար կարող է պարզապես վերածվել մի ճահճի, որտեղ հազիվ թե հնարավոր լինի հասնել հաղթանակի: Այդուհանդերձ, հարցադրումը շատ պոպուլյար է և այն գործնականում հնչում է այնքան հաճախ, որ այդպիսով ստեղծում է նաև համապատասխան միջավայր:
Թրամփը թերևս ունի այդ միջավայրը «ցրելու» խնդիր, քանի որ դրա պահպանումը կարող է դառնալ նրան իրապես կաշկանդող և կաղապարող հանգամանք, այդ կերպ պարզապես զրկելով Իրանի հարցում դիվանագիտական խաղի տարածությունից ու ժամանակից: Երբ գեներացվում են այդօրինակ երկիմաստ սպասումներ, դիլեմա՝ հարվածել-չհարվածելու, ապա մի կողմից պարզ է, որ հարվածելը և պատերազմի մեջ մտնելը կլինի արկածախնդրություն, մյուս կողմից՝ չմտնելու պարագայում էլ ցանկացած դիվանագիտական շարժ կդիտվի ուղղակի, թե անուղղակի նահանջի նշան:
Ըստ ամենայնի, Թրամփի թիմը փնտրելու է միջազգային հարաբերություններում այդ «դիլեման» հաղթահարելու ուղիներ, միջավայրը փոխելու հնարավորություններ: Այդ տարբերակը բավականին շահեկան կլինի Հայաստանի համար, հաշվի առնելով այն, որ Երևանն անմիջականորեն գտնվում է Իրանի «ուղեծրում», հետևաբար ԱՄՆ քաղաքականության առնչությամբ «հարվածել-չհարվածելու» դիլեմայի չեզոքացումը անշուշտ կնվազեցնի որոշակի լարվածության սպասում ամբողջ ուղեծրով: Մյուս կողմից իհարկե դա բոլորովին չի նշանակում, որ ԱՄՆ հրաժարվելու է այն աշխարհաքաղաքական շահերից, որոնք հատվում են Իրանի համար կենսական գոտիներում, այդ թվում նաև՝ Կովկասում: Այդ հարցերը սակայն Թրամփն ըստ ամենայնի դիտարկում է Ռուսաստանի և Չինաստանի նախագահների հետ քննարկումների շրջանակի հարց:
