Տեղի է ունեցել Թուրքիայի և Ադրբեջանի արտգործնախարարների հեռախոսազրույց, որի ընթացքում, ըստ հաղորդագրության, Բայրամովն ու Ֆիդանը քննարկել են միջազգային ու ռեգիոնալ անվտանգության հարցեր, իրավիճակը Մերձավոր Արևելքում և Սիրիայում, ինչպես նաև աղետի ենթարկված ադրբեջանական օդանավի հետ կապված հարցեր: Օդանավի աղետից հետո Իլհամ Ալիևի հետ հեռախոսազրույց էր ունեցել նաև Թուրքիայի նախագահ Էրդողանը:
Դրանից հետո արտգործնախարարների հեռախոսազրույցը հուշում է, որ բացի «սոլիդարության» ակտից, Անկարան Բաքվի հետ քննարկում է նաև որոշակի քայլերի հետ կապված հարցեր: Ադրբեջանական օդանավի աղետը մարդկային ողբերգություն լինելով, կարծես թե դառնում է նաև քաղաքական «գործընթաց», որում սկսել են բախվել էական շահեր, հետապնդվել ընդհուպ աշխարհաքաղաքական նպատակներ: Զարմանալի չէ, որ Թուրքիան ձգտում է լինել այդ «գործընթացում», որտեղ կարող են կայացվել ռուս-ադրբեջանական պայմանավորվածություններ:
Ավելին, պայմանավորվածությունների համակարգը կարող է ներառել նաև Ղազախստանը: Փաստացի, երկու պետություն, որոնք Թուրքիայի ռազմավարական հետաքրքրության տիրույթում են և Անկարայի առաջնորդած Թյուրքալեզու պետությունների կազմակերպության անդամ: Ադրբեջանական օդանավի աղետի հարցում ռուսական ՀՕՊ համակարգի «դերի» վերաբերյալ ոչ պաշտոնական խոսակցություններն ու վարկածները ուժգնանում են, ստեղծելով բավականին խրթին իրավիճակ: Ինչպիսի՞ վարք է ցուցաբերելու Ռուսաստանը, եթե հաստատվեն դրանք, կամ, ի՞նչ ձևակերպումներ են գտնելու Մոսկվան, Բաքուն ու Աստանան, Ռուսաստանի ՀՕՊ «դերը» շրջանցելու համար:
Թե՞ Մոսկվան այդ խնդիրը պարզապես կարող է դնել հենց Բաքվի ու Աստանայի վրա, իսկ Թուրքիան այդ պարագայում շտապում է նրանց օգնության: Պետք չէ բացառել անշուշտ, որ Բաքուն է օգնության համար դիմում Թուրքիային՝ Ռուսաստանի հանդեպ հայտնվելով իսկապես բարդ վիճակում: Համենայն դեպս, քաղաքական «ռեբուսի» վերածվող մարդկային ողբերգությունը կարող է դառնալ ընդհուպ չնախատեսված զարգացումների «տրիգեր»:
