Ռուսական Regnum լրատվական գործակալության փոխանցմամբ՝ երեկ Նախիջևանում տեղի է ունեցել Թուրքիայի գլխավոր հյուպատոսության նոր վարչական շենքի հիմնարկեքի արարողությունը։ Դրան մասնակցել են Ադրբեջանում Թուրքիայի դեսպան Հուլուսի Քըլըչը, Նախիջևանի ինքնավար հանրապետության (ՆԻՀ) կառավարության առաջին փոխվարչապետ Ասեֆ Մամեդովը, ՆԻՀ-ում Թուրքիայի գլխավոր հյուպատոս Այհան Էնգինիարը և այլ պաշտոնատար անձինք։
Իր ելույթում թուրք դեսպանը ՆԻՀ-ը որակել է որպես «թյուրքական աշխարհի պատուհան»։ Նա ընդգծել է. «Այսօր հիանալի հարաբերություններ գոյություն ունեն Թուրքիայի ու ՆԻՀ-ի միջև, որոնք ավելի են ամրագրվելու։ Թուրքիան մեծ ուշադրություն է հատկացնում այս հիանալի մարզին, որը հանդիսանում է դեպի թյուրքական աշխարհ բացվող պատուհան»։
Հիշեցնենք, որ ՆԻՀ-ում Թուրքիայի գլխավոր հյուպատոսությունը բացվել է 1993 թվականի փետրվարի 5-ին։ Դրանից առաջ էլ՝ 1992 թվականի մայիսին, բացվել էր Արաքս գետի վրա կառուցված Հասրեթ (թարգմանաբար` կարոտ) կամուրջը, որն ադրբեջանցիներն անվանում են նաև «Հույսի կամուրջ»:
Մոտ 2 միլիոն դոլար արժեցած կամրջի բացման արարողությանը մասնակցել էր նաև Թուրքիայի վարչապետ Դեմիրելը, որը հայտարարել էր, թե այս կամրջի բացմամբ վերջ տրվեց 70-ամյա կարոտին, և Թուրքիան ու Նախիջևանը «գրկախառնվեցին» միմյանց:
Ի դեպ, ժամանակին Ադրբեջանի նախկին նախագահ Հեյդար Ալիևը ՆԻՀ-ը որակել է որպես դեպի թուրք-իսլամական աշխարհ բացվող դուռ:
