Կամերունի Մամֆե քաղաքում զինյալները հարձակում են իրականացրել և տներ այրել վաղ առավոտյան, երբ մարդիկ դեռ քնած են եղել։ Հարձակման հետևանքով կա առնվազն 20 զոհ։ Այս մասին հաղորդում է Reuters գործակալությունը՝ վկայակոչելով տեղի իշխանություններին։
Եվս 7 մարդ գտնվում է հիվանդանոցում։
Իշխանությունները հայտարարել են, որ իրավիճակը գտնվում է վերահսկողության տակ և բնակչությանը հորդորել են խուճապի չմատնվել։
Նշվում է, որ Կամերունի՝ փոքրամասնություն կազմող անգլիախոս հատվածներում անջատողականները 2017 թ․-ից պայքարում են Ամբազոնիա անվամբ անկախ պետություն ստեղծելու ուղղությամբ։ Հիմնականում ֆրանսիախոս այս աֆրիկյան երկրի Հյուսիս արևմտյան և Հարավ արևմտյան նահանգներում զինված խմբերը ժամանակ առ ժամանակ հարձակումներ և սպանություններ են իրականացնում, առևանգում մարդկանց։
Առայժմ ոչ մի խմբավորում պատասխանատվություն չի ստանձնել նոյեմբերի 6-ին տեղի ունեցած հարձակման համար։
