Երեւանում Հայաստանի արտգործնախարար Միրզոյանի հետ համատեղ ասուլիսի ընթացքում Գերմանիայի արտգործնախարար Անալենա Բերբոքը պատասխանելով Եվրամիության ու Հայաստանի մերձեցման վերաբերյալ հարցին, փաստացի Երեւանին վերադարձրեց գնդակը, որ Եվրախորհրդարանում իր ելույթում Եվրամիության դաշտ էր ուղարկել Հայաստանի վարչապետ Նիկոլ Փաշինյանը:
Նիկոլ Փաշինյանը այդ ելույթում հայտարարել էր, որ Հայաստանը պատրաստ է Եվրամիության հետ հարաբերության սերտացման, մերձեցման այնքան, որքան պատրաստ է Եվրամիությունը: Ինչպես առիթ եմ ունեցել անդրադառնալու հենց այդ ելույթից հետո, Նիկոլ Փաշինյանը փաստացի Հայաստան-ԵՄ հարաբերության հարցում գնդակն ուղարկեց Եվրամիության դաշտ, դրա հետ մեկտեղ նաեւ պատասխանատվությունը՝ Եվրախորհրդարանի ամբիոնից իր ելույթով եւ դրանում ժողովրդավարությանն առնչվող շեշտադրումներով փորձելով ցույց տալ, որ Հայաստանն իր մասով պատասխանատվությունն իրացրել է:
Երեւան ժամանած Գերմանիայի արտգործնախարար Անալենա Բերբոքին հարց ուղղվեց, թե ինչ կարող է ասել Գերմանիան այդ մասով, որքա՞ն է Եվրամիությունը պատրաստ Հայաստանի հետ մերձեցման: Գերմանիայի արտգործնախարարի պատասխանը թերեւս հնարավոր է գնահատել հիասթափեցնող, իհարկե միայն առաջին հայացքից, եթե գնահատման ելակետ ենք դիտարկում այն, որ իրական քաղաքականության ռեժիմում ժողովրդավարության բաղադրիչն ունի հիմնարար նշանակություն եւ գերակայում է ընդհանուր տնտեսա-քաղաքական շահի նկատմամբ: Գերմանիայի արտգործնախարարը հայտարարեց, որ Եվրամիության աշխատանքի առանցքային ուղղությունը Կովկասի խաղաղությունն է:
«Կենտրոնական նպատակ է միասին բոլորս փոխանակենք մտքերը եւ մեր ներդրումն ունենանք այս խաղաղության գործընթացում եւ անցնենք տնտեսական ծրագրերին», հայտարարեց Բերբոքը: Գերմանիայի արտգործնախարարը բավականին պարզորոշ մատնացույց է անում իրական քաղաքականության հիմնարար շարժառիթը՝ տնտեսա-քաղաքական շահ: Բերբոքը ակնարկում է, որ Եվրամիությունը Կովկասը դիտարկում է մեկ միավոր, հետեւաբար Հայաստանի հետ մերձենալ պատրաստ է այնքան, որքան պատրաստ է մերձենալ նաեւ Ադրբեջանի հետ, իսկ «հավասարապես» մերձենալու բանաձեւ տեսնում է ոչ թե ժողովրդավարությունը, այլ՝ խաղաղության մասին համաձայնությունը: Սա է իրական քաղաքականությունը, որից պետք է ոչ թե հիասթափվել, այլ որը պետք է ճանաչել եւ աշխատել առանց պատրանքի, սեփական շահերի պաշտպանությունն ու հնարավորությունը փնտրելով հենց այդ իրական քաղաքականության ճանաչման միջոցով:
Գործնականում նույն հարթությունում էր նաեւ ասուլիսի ընթացքում հնչած թերեւս մյուս առանցքային եւ ինդիկատորային հարցի պատասխանը՝ արդյո՞ք Բեռլինը գազի եւ նավթի պատժամիջոց կկիրառի Բաքվի դեմ, եթե Ադրբեջանը ռազմական ուժ գործադրի Հայաստանի հանդեպ Բերբոքի պատասխանը դարձյալ խաղաղության շուրջ պայմանավորվելու մասին էր: Գերմանիայի արտգործնախարարը հայտարարեց, որ Եվրամիությունը Հայաստանի եւ Ադրբեջանի միջեւ պետք է դիրքավորվի որպես չեզոք խաղացող:
