WikiLeaks-յան վերջին բացահայտումներից մեկն առնչվում է Հայաստանում տիրող անպատժելիության մթնոլորտին։ Հայաստանում ԱՄՆ դեսպանատնից Վաշինգտոն ուղարկված հաղորդագրությունը թվագրված է 2004 թվականի ապրիլի 7-ով։
Դրանում նշված է. «Հայաստանի Հետաքննող լրագրողների ասոցիացիայի պատրաստած զեկույցի համաձայն՝ պաշտոնաթող գեներալ և խորհրդարանական Սեյրան Սարոյանի որդին ներքաշված է եղել մարտի 13-ին Էջմիածնում կատարված երիտասարդների սպանության մեջ։ Նշվում է, որ նրանց սպանությունն իրականացվել է անձամբ գեներալի հրահանգով, ով զայրույթի մեջ է հայտնվել, երբ իմացել է, որ նրանք դանակահարել են իր որդուն։
Երիտասարդները պաշտպանել են մի աղջկա, որին անհանգստացրել է գեներալի որդին։ Ոստիկանությունը դրա համար մեղադրել է գեներալի հեռավոր ազգականներից մեկին, սակայն դեռ հայտնի չէ, թե դա ինչով կավարտվի։
Մարտի 21-ին Հայաստանի Հետաքննող լրագրողների ասոցիացիայի հրապարակած զեկույցում նշված է, որ սպանվել է գեներալի որդու հետ միջադեպի մեջ մտած 23-ամյա Սեպուհ Կարապետյանը։ Վերջինիս ընկերը, ով, վրեժխնդրության ու վախի մթնոլորտից դրդված, չցանկացավ հայտնել իր անունը, նշել է, որ Սեպուհի սպանությանը մասնակցել է գեներալի որդին՝ Զարզանդ Սարոյանը՝ իր հոր թիկնազորի ու մերձավորների հետ։
Նա հայտնել է, որ երբ Սեպուհն՝ իր հոր և ընկերոջ հետ, Զարզանդի հետ քննարկել է նրա կողմից աղջկա հետապնդումների հարցը, սկսվել է ծեծկռտուք, ինչի ժամանակ էլ Սեպուհի ընկերը, պաշտպանական նկատառումներից ելնելով, դանակահարել է գեներալի որդուն։ Մարտի 21-ին Էջմիածնի ոստիկանությունը քրեական գործ է հարուցել Սեպուհի ավագ եղբոր դեմ՝ նրան վիճաբանության մեջ ներքաշելու համար։
Նույն օրն իմանալով տեղի ունեցած միջադեպի մասին՝ Մոսկվայում գտնվող
գեներալ Սարոյանը իր որդուն հրահանգել է վրեժխնդիր լինել նրանցից։ Գեներալի 8 թիկնապահները սկսել են քաղաքում որոնել այդ երեք անձանց։ Նրանց հաջողվում է հայտնաբերել Սեպուհին՝ երկու ընկերների հետ և դաժան ծեծի ենթարկել նրանց։
23-ամյա Սեպուհի դիակը գտնում են խոշտանգված ու բարբարոսաբար ծեծված: Կոշիկներն ու գուլպաները հանել էին ու բաց ոտքերին այնքան էին հարվածել, որ ծնկներից ներքև դրանք բավական փափկել էին: Ձեռքերը ծակել էին սուր գործիքով: Դատաբժշկական փորձաքննությունը փորձել է վերացնել խոշտանգումների հետքերը։
Մարտի 31-ին Հայաստանի ոստիկանության հասարակական կապերի բաժինը հայտարարեց, որ Սեպուհի սպանության գործով ձերբակալվել է Արայիկ Սարոյանը՝ գեներալի հեռավոր ազգականը, ով մեղադրվում է դիտավորյալ սպանության մեջ։ Սեպուհի ընտանիքը ցանկացել է բողոքել այդ ամենի դեմ և արդարություն պահանջել, սակայն վախի մթնոլորտի ազդեցությամբ հրաժարվել է իր մտադրությունից։
Ի դեպ, Հայաստանի Հետաքննող լրագրողների ասոցիացիայի 2007 թվականի մարտի 21-ի զեկույցում նշված է, որ նույն Զարզանդ Սարոյանը վրաերթի է ենթարկել 10-ամյա երկու տղաների, որոնցից մեկը մահացել է, իսկ մյուսը դարձել հաշմանդամ։
Այս և վերջին տարիներին գրանցված նմանատիպ միջադեպերը ուժեղացրել են շատ հայերի մոտ ծնունդ առած այն տպավորությունը, որ երկրում առկա է լավ կապեր ունեցողների ու օլիգարխների մի դաս, որոնք կարող են անպատժելիորեն թալանել, սպանել ու հաշմանդամ դարձնել մարդկանց»։
