Օրերս ազգությամբ վրացի երկու երիտասարդ անսթափ վիճակում մտել են Հավլաբարի Սուրբ Էջմիածին եկեղեցին և ագրեսիվ ու անհարգալից վերաբերմունք ցուցաբերել հայկական եկեղեցու նկատմամբ:
Թբիլիսիի Հայկական ասամբլեայի համակոորդինատոր Առնոլդ Ստեփանյանը «Առաջին լրատվական»-ի հետ զրույցում նշեց, որ եկեղեցու վրա հարձակումը կապված է Վրաստանում և մասնավորապես Թբիլիսիում առկա հակահայկական հիստերիայի հետ, որն ավելի շատ սրվել է հայկական եկեղեցուն կարգավիճակ տալու մասին օրենքի ընդունումից հետո:
«Հիմա Վրաստանում մի քանի խմբավորումներ կան, որոնք շարունակում են հակահայկական հիստերիայի զարգացումը և դրանով փորձում են քաղաքական դիվիդենտներ ստանալ»,- հավելեց Ստեփանյանը:
Նրա խոսքերով` հակահայկական գործողություններ իրականացնող խմբերը տարատեսակ են` կան հասարակական կազմակերպություններ, կան ուղղակի խմբեր` ոչ կազմակերպված, և կան մի քանի կուսակցություններ, որոնք աջակցում են այդ խմբերին, ինչպես նաև վրացական եկեղեցում կա մի խումբ, որը հակահայկական տրամադրություններ ունի:
Ստեփանյանը տեղեկացրեց, որ երկու քաղաքական կուսակցությունների մասին ինֆորմացիա կա, սակայն դեռևս ինքը չի ցանկանում բաց խոսել վերջիններիս մասին, քանզի սպասում են պրոցեսների զարգացմանը:
Բացի եկեղեցու վրա հարձակումից՝ վրացական խմբավորումներն իրենց հակահայկական տրամադրությունները արտահայտում են նաև այլ ձևերով: Ինչպես պատմեց Ստեփանյանը, մի անգամ պատերի վրա հայերին ուղղված հայհոյանքներ են գրված եղել և պատկերված ֆաշիստական սվաստիկա. «Հակահայկան հիստերիան հնարավոր է տեսնել նաև վրացական թերթերում: Կան կոնկրետ թերթեր, որոնց տարածքի 60-70 տոկոսում հակահայկական նյութեր են զետեղված»:
