ԱՄՆ պաշտպանության նախարարության բարձրաստիճան պաշտոնյայի խոսքով՝ Ուկրաինայի զինված ուժերը հնարամիտ են՝ ձգտելով կանխել ռուսական բանակի գերակայությունը երկնքում
Ուկրաինայի զինված ուժերը, ինչպես նաև քաղաքացիական անձինք շարունակում են խափանել ռուսական բանակի գործողությունները։ Այս մասին հայտարարել է ԱՄՆ պաշտպանության նախարարության բարձրաստիճան մի պաշտոնյա։
«Ակնհայտ է, որ ուկրաինացիները դիմադրությունը դադարեցնելու և ռուսական բանակի վրա հարձակումները դանդաղեցնելու նշաններ ցույց չեն տալիս»,- ասել է պաշտոնյան։ «Ուկրաինացիները տպավորիչ կարողություններ են ցուցաբերում՝ պաշտպանելու իրենց քաղաքներն ու համաքաղաքացիներին», – ասել է նա:
«Նրանք օգտվում են տրամադրված օգնությունից։ Այն ունի կարճ պահպանման ժամկետ: Նկատի ունեմ, որ օգնությունը փոոխանցվում է ուկրաինացիներին, և նրանք անմիջապես օգտվում են դրանից»,- ասել է պաշտոնյան։
Նա նաև բարձր է գնահատել Ուկրաինայի զինված ուժերի կողմից հակաօդային պաշտպանության միջոցների օգտագործումը։
«Նրանք շատ հմուտ են, շատ պրոֆեսիոնալ են այն հարցում, թե ինչպես, երբ և որտեղ կիրառել ՀՕՊ համակարգեր… Ուկրաինայի զինված ուժերը հնարամիտ են՝ փորձելով կանխել ռուսական բանակի գերակայությունը Ուկրաինայի երկնքում: Մենք կարծում ենք, որ Ուկրաինայի օդային տարածքը վիճարկվում է»,- ասել է պաշտոնյան։
Ներխուժման սկզբից ի վեր Ռուսաստանը, ըստ ԱՄՆ-ի, ավելի քան 1100 հրթիռ է արձակել Ուկրաինայի թիրախների ուղղությամբ: Ռուսական բանակը շարունակում է հրթիռային և հրետանային կրակի ենթարկել ուկրաինական քաղաքները։
Հաղորդվում է, որ որոշ ռուսական ստորաբաժանումներ բարոյական խնդիրներ ունեն: Ռուս զինվորականների թույլ կողմերից է նախաձեռնության բացակայությունը, հատկապես կրտսեր հրամանատարների շրջանում, ասել է ամերիկացի պաշտոնյան։
Պենտագոնը կարծում է, որ Ռուսաստանը բախվում է ճշգրիտ կառավարվող զինամթերքի պակասի հետ։ Սա է պատճառներից մեկը, որ «չկառավարվող ռումբերն» ավելի ու ավելի շատ են օգտագործվում, ասել է պաշտոնյան։
«Մենք նաև տեսանք, թե ինչպես որոշ ճշգրիտ կառավարվող զինամթերք չաշխատեց ռուսական բանակում։ Դրանք կա՛մ անհնար էր արձակել, կա՛մ չեն խոցել թիրախը, կա՛մ չեն պայթել հարվածից»,- ասել է Պենտագոնի բարձրաստիճան պաշտոնյան:
Ռուս պաշտոնյաները պնդում են, որ մարտի 18-ին «Կինժալ» հիպերձայնային հրթիռները հարվածել են Իվանո-Ֆրանկիվսկի շրջանում գտնվող զինամթերքի պահեստը։ Ուկրաինայում դա հերքեցին և հայտարարեցին, որ հրթիռները խոցել են երկրի արևելքում գտնվող գյուղատնտեսական տեխնիկայի պահեստը։
ԱՄՆ պաշտպանության նախարարության պաշտոնյաները չեն կարողացել հաստատել կամ հերքել այս պնդումները: Ամերիկացի պաշտոնյայի խոսքով՝ ռազմական տեսանկյունից անիմաստ է հիպերձայնային հրթիռի արձակումը, եթե առկա է ճշգրիտ կառավարվող զինամթերք։
