Ուկրաինայում ռազմաքաղաքական լարվածության աճի ֆոնին հինգ երկիր՝ ԱՄՆ-ը, Մեծ Բրիտանիան, Գերմանիան, Կանադան և Ավստրալիան հայտարարել են Ուկրաինայից իրենց դիվանագետների մի մասին և նրանց ընտանիքներին Ուկրաինայից տարհանելու որոշման մասին:
Ուկրաինայի արտգործնախարար Դմիտրի Կուլեբան հաղորդել էր, որ Ուկրաինայում գտնվող 129 դիվանագիտական ներկայացուցչություններից միայն չորս երկրի՝ Միացյալ Նահանգների, Մեծ Բրիտանիայի, Գերմանիայի և Ավստրալիայի դեսպանություններն էին Կիևին տեղեկացրել իրենց աշխատակիցներին տարհանելու որոշման մասին: Իսկ ավելի ուշ այդպիսի որոշման մասին հայտարարել է նաև Կանադայի արտգործնախարարությունը:
Ըստ ՏԱՍՍ-ի՝ ճապոնական Kyodo-ի աղբյուրները հաղորդել են, որ Ճապոնիայի կառավարությունը նույնպես ուսումնասիրում է Ուկրաինայից իր քաղաքացիներին, այդ թվում դեսպանատան աշխատակիցներին տարհանելու անհրաժեշտությունը:
ՏԱՍՍ-ի հաղորդմամբ՝ Ուկրաինայի ԱԳ նախարարը նշված երկրների որոշումը վաղաժամ է համարում: Ուկրաինայի իշխանությունների կարծիքով՝ դրա համար իրական հիմքեր չկան:
Ուկրաինայի շուրջ Ռուսաստան-ՆԱՏՕ ռազմաքաղաքական լարվածության աճին զուգահեռ Ռուսաստանը և Միացյալ Նահանգները բանակցություններ են վարում նախագահների, արտգործնախարարների և ավելի ցածր մակարդակներով՝ հետագա սրացումներից խուսափելու համար: Վաշինգտոնի և ՆԱՏՕ-ի դաշնակիցների հիմնական մտահոգությունը Ուկրաինա ռուսական զորքերի ներխուժման ենթադրյալ սպառնալիքն է, Մոսկվայի մտահոգությունը՝ ՆԱՏՕ-ի ընդլայնումը դեպի Արևելք, այդ թվում՝ Ուկրաինայի հնարավոր անդամակցումը Հյուսիսատլանտյան դաշինքին:
