Այսօր՝ հոկտեմբերի 30-ին, վարչապետ Նիկոլ Փաշինյանը հերթական հանդիպումն է ունենալու արտախորհրդարանական ուժերի ղեկավարների հետ: Ավելի վաղ նա արտախորհրդարանական ուժերի ներկայացուցիչների հետ քննարկումների նոր հարթակն անվանել էր մտագրոհի տեղ: Որքանով է այդ հարթակը դարձել մտագրոհի տեղ, որքանով է այն արդյունավետ, և արդյոք արտախորհրդարանական այն ուժերը, որոնք մասնակցել են նախորդ հանդիպումներին, այս անգամ ևս կմասնակցեն:
Մասնավորապես, Տիգրան Արզաքանցյանը այդ հանդիպումների ժամանակ ներկայացնում էր Հայաստանի դեմոկրատական կուսակցությունը, սակայն նա այլևս որևէ առնչություն չունի այդ կուսակցության հետ, փոխարենը նշանակվել է Տիգրան Ուրիխանյանի գլխավորած «ԱԼՅԱՆՍ» կուսակցության գերագույն խորհրդի նախագահը:
«Առաջին լրատվական»-ի հետ զրույցում Տիգրան Արզաքանցյանը հավաստիացրեց, որ վարչապետի հետ հերթական հանդիպմանը մասնակցելու է. «Բա չգնա՞մ տեսնեմ՝ ինչ է կատարվում: Մենք ընտրությունների արդյունքներով չենք եկել իշխանության և հնարավորություն չունենք կատարելու մեր ծրագրերը, դրա համար այդ ծագրերը ներկայացրել ենք վարչապետի հետ հանդիպմանը: Նախորդ անգամ 5 հարց էի ես ներկայացրել, որից երկուսը արդունավետ գնաց առաջ։ Մենք կոլեգիալ քննարկում ենք, որ այդ հարցերն առաջ տանենք: Դրանք վերաբերում են մեր ազգի զարգացմանը, արդյունավետ աշխատանքին:
Ես չէի պատկերացնում, որ այդքան ներկայացրած հարցերի մեջ իմ ներկայացրածներից երկուսը կընդգրկվի: Եթե մեր աշխատանքը արդունավետ լինի, օգտակար քայլերի դիմենք, գնա առաջ, ինչի՞ պետք է հրաժարվեմ: Իմ ժամանակը ինձ համար ամենաթանկն է, որ իմանամ անիմաստ եմ ժամանակ ծախսում, չեմ գնա»,-հայտարարեց Արզաքանցյանը՝ հավելելով, որ այս անգամ կներկայանա որպես «ԱԼՅԱՆՍՍ» կուսակցության գերագույն խորհրդի նախագահ:
Պահպանողական կուսակցության նախագահ Միքայել Հայրապետյանը «ԱՌաջւին լրատվական»-ի հետ զրույցում հիշեցրեց, որ դեռևս օգոստոսին ինքը հայտարարել էր, որ սեպտեմբերյան հանդիպումը կարող է լինել վերջինը կամ վերջիններից մեկը:
Հարցին, թե շարունակելո՞ւ է մասնակցել Փաշինյանի հետ հանդիպումներին, նա պատասխանեց. «Սեպտեմբերի կեսի հանդիպումից հետո հաջորդը պետք է լինի հոկտեմբերի վերջին, որի հրավերն արդեն իսկ ստացել ենք: Մեզ համար դեռևս այնքան էլ միանշանակ չէ հետայսու ևս մեր մասնակցության նպատակահարմարությունը: Ինչպես հրապարակավ հայտարարել էինք, Պահպանողական կուսակցությունը հանդիպումներին մասնակցել էր՝ ելնելով պետականության համար շանթարգելի առաքելության գիտակցումից: Բայց դեռևս օգոստոսին բառացի նշել էի, որ սեպտեմբերյան հանդիպումը կարող է լինել վերջինը կամ վերջիններից մեկը:
Մեր երկիրը հիմա շատ փխրուն իրավիճակում է՝ կապված միջազգային ու տարածաշրջանային բարդագույն զարգացումների հետ, և որևէ կտրուկ քայլ այսօր կարող է վտանգավոր լինել: Մենք ջուր չենք լցնի Հայաստանի ինքնիշխանության դեմ գործող ռուս-թուրքական ջրաղացին: Խորենացին դեռևս 1600 տարի առաջ էր ասել, որ սեփական հիվանդ ոչխարը չի կարելի փոխել օտարի առողջ գազանի հետ»:
Հայաստանի եվրոպական կուսակցության ղեկավար Տիգրան Խզմալյանը ևս մտադիր է մասնակցել վաղը կայանալիք հանդիպմանը. «Այո, մասնակցելու եմ, մենք ընդամենը մեկ անգամ ենք ամսվա մեջ հանդիպում, ծիծաղելի կլինի ասել որ արդյունավետ է, բայց ասել անարդյունավետ է, դա էլ չեմ կարող: Բոլոր հանդիպումների ժամանակ պնդում եմ, որ պետք է եվրաինտեգրման հարցը քննարկել է: Այդպիսի կառույց խորհրդարանում կա, բայց այն անարդունավետ է, և պետք է ավելի լուրջ պետք է զբաղվել դրանով»,-ասաց նա:
Հարցին, թե արդյոք եվրաինտերգրման գործընթացից ինքը գոհ է, Խզմալյանը պատասխանեց. «Ոչ իշխանության մաս եմ կազմում, ոչ էլ իրավունք ունեմ իրենց անունից խոսել, բայց չմոռանանք, որ ԱՄՆ-ի և Ֆրանսիայի նախագահները, այդ երկրների դեսպաններն առաջինը վերցրին իրենց վրա այդպիսի գործառույթ, և Հայաստանի եվրոպական կուսակցությունը ստեղծված է հենց այդ գործընթացը սպասարկելու համար: Այնպես որ, եթե իշխանություններն ուզում են մնալ քաղաքական դաշտում, այլ ճանապարհ չունեն»:
Քրիստոնեա-ժողովրդավարական կուսակցության ղեկավար Լևոն Շիրինյանը ևս մասնակցելու է վաղվա հանդիպմանը, ով դա շատ արդյունավետ հարթակ է համարում. «Գնալու եմ մեր կուսակցության պատկերացումներով, հենց այդ ծրագրի շրջանակներում: Ուրիշ այլ թեմաներ էլ կան, բացի այդ, առաջին աղբյուրից վարչապետից կստանանք հարցերի պատասխանները, ոչ թե ինչ-որ մուտիլովշչիկներից»,-ընդգծեց նա: