«Առաջին լրատվական»-ի հարցերին պատասխանել է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն
Վրաստանում արձանագրվել է մահացության ամենաբարձր ցուցանիշը համավարակի սկզբից ի վեր: Ինչպե՞ս եք գնահատում իրավիճակը, կարելի՞ է արձանագրել, որ առողջապահական հակամարգը փլուզվել է:
Դե ինչպե՞ս կարելի է գնահատել, իհարկե, աղետ է: Մենք աշխարհում առաջին տեղում ենք մահացության մակարդակով: Միաժամանակ, իշխանությունները չեն ձեռնարկում անգամ 10 տոկոսն այն միջոցառումների, որոնք կիրառվել էին մեր երկրում անհամեմատ ավելի համեստ ցուցանիշների դեպքում: Միայն երեկ են արգելել հասարակական տրանսպորտի գործունեությունը և պարտադրել բոլորին կրել դիմակներ փողոցում: դեպ, վերջին պահանջը շատ քչերն են կատարում: Իշխանությունների նման «տարօրինակ» վարքի պատճառը աշնանը կայանալիք տեղական ընտրություններն են: Մեզ մոտ արդեն հիվանդանոցներում տեղ չկա, չկան մասնագետներ, շտապօգնության մեքենան ժամանում է կանչից հետո շատ ժամեր անց: Իսկ ամենավատն այն է, որ առանց լուրջ սահմանափակումների մարդիկ չեն զգում վտանգը: Պատվաստումների գործընթացը լրջորեն սկսվել է ընդամենը մեկ ամիս առաջ: Մենք ուշացել ենք, և դա ողբերգական հետևանքներ է ունենալու ինչպես Վրաստանի, այնպես էլ հարևան երկրների համար:
Հնարավոր համարում եք, որ սահմանները նորից փակվեն, թե հենց սահմանների փակ լինելն էլ հանգեցրել է Վրաստանում այս իրավիճակին, քանի որ սկզբում Վրաստանը ամենաշատն էր պաշտպանված։
Սահմանները փակելու համար արդեն ուշ է, բայց բոլոր դեպքերում ստիպված կլինեն փակել: Շատերը չեն հավատում պատվաստմանը, և իզուր: Եթե մենք պատվաստումները սկսեինք գոնե մի քանի ամիս առաջ, նման աղետից հնարավոր կլիներ խուսափել:
Արդյոք կա մոտավոր գնահատական, թե որքանով է կորոնավիրուսը վնաս հասցրել Վրաստանի տնտեսությանը:
Տնտեսության վնասի վերաբերյալ ցանկացած գնահատական, ընդ որում, ոչ միայն Վրաստանում, նման է փաստերը մանիպուլացնելուն, վատ համատեղելի համեմատություններ անելուն՝ սեփական տեսակետը հիմնավորելու համար: Այնպես որ, եկեք չզբաղվենք շամանություն անելով: Մարդին վնասներ են կրել, հատկապես տուրիզմի բիզնեսում: Տնտեսությանը գուցե այդքան էլ մեծ վնաս չի հասցվել, բայց այ մարդկանց վնասը զգալի է:
