Գազայի հատվածի ուղղությամբ իսրայելական շարունակվող հրթիռային հարվածների զոհերի թիվը հասել է 35-ի։ Այս մասին հայտնում է պաղեստինյան Al-Mamlaka հեռուստաալիքը՝ հղում անելով անկլավի առողջապահության նախարարությանը։
Հաղորդվում է, որ գիշերային հարվածներին զոհ է գնացել 3 պաղեստինցի։ Երեքշաբթի սպանվել է 15 մարդ, իսկ երկուշաբթիից զոհվել է ընդհանուր առմամբ 35 մարդ։ Զոհերից 12-ը երեխաներ են, մեկը՝ կին։ Տուժածների թիվը հասել է 233-ի։
Գազայի հատվածի «Աշ-Շիֆաա» բժշկական համալիրի տնօրեն Մուհամմադ Աբու Սելիմի խոսքով՝ առողջապահական համակարգն առանց այդ էլ հյուծված է բազմամյա շրջափակումից, դրան ավելացել է կորոնավիրուսային պանդեմիան, այդ իսկ պատճառով իրենց հնարավորություները սահմանափակ են։ Բոլոր վիրահատարանները զբաղված են, բժշկական բրիգադներն աշխատում են դաշտային պայմաններում։
Հիթիռային հարվածների փոխանակությունն Իսրայելի և Գազայի հատվածի միջև հաջորդել է Արևելյան Երուսաղեմի Ալ-Աքսա մզկիթի մոտ տեղի ունեցած անկարգություններին, որոնց հետևանքով վերջին օրերին տուժել է ավելի քան 700 մարդ։ Կարմիր մահիկի հաղորդմամբ՝ միայն երեքշաբթի Հորդանան գետի Արևմտյան ափում Իսրայելի բանակի հետ բախումներում տուժել է առնվազն 245 պաղեստինցի։
Պաղեստինցիների և ուժայինների բախումների հիմքում ընկած է Շեյխ Ջարահ թաղամասում արդեն ավելի քան կես դար ապրող արաբական ընտանիքներին վտարելու իշխանությունների որոշումը՝ հօգուտ հրեա վերաբնակիչների։ Որպես հիմնավորում նշվում է այն, որ այդ կացարանները պատկանել են նրանց մինչև 1948 թվականը։ Տները գտնվում են Ալ-Աքսա մզկիթից 500 մետր հեռավորության վրա։
Խոսքը դեռևս վերաբերում է 8 ընտանիքի, սակայն պաղեստինցիները մտավախություն ունեն, որ շուտով բոլորին բռնի կտեղահանեն տներից, որոնք ժամանակին իրենց հատկացրել է Հորդանանը՝ որպես Արևելյան Երուսաղեմում իսլամական սրբավայրերի պահապան։
