Հունիսի 20-ի ընտրությունները, ըստ էության, լինելու են հին ընտրական օրենսգրքով: Բացի ռեյտինգային ընտրակարգից որևէ այլ կարգավորում չի փոխվելու առաջիկա ընտրությունների համար: ԱԺ պետաիրավական հարցերի մշտական հանձնաժողովը երեկ որոշեց ընտրական օրենսգրքի փոփոխությունների ամբողջական փաթեթի քննարկումը հետաձգել հաջորդ շաբաթ։ Իսկ դա նշանակում է, որ նախագիծը քննարկվելու է ընտրությունների նշանակումից հետո, քանի որ ըստ ժամանակացույցի հաջորդ երկուշաբթի օրը նախագահը սահմանադրության համաձայն նշանակելու է արտահերթ ընտրությունների օրը։
Հիշեցնենք, որ սահմանադրությամբ սահմանվում է, որ վարչապետ չընտրելու երկրորդ փորձից հետո նախագահն անհապաղ նշանակում է ընտրություններ։ Այսինքն ենթադրվում է, որ մայիսի 11-ին Ազգային ժողովի կողմից երկրորդ անգամ վարչապետ չընտրելուց անմիջապես հետո, հենց երկուշաբթի երեկոյան նախագահը հրամանագիր կստորագրի ընտրությունների նշանակման վերաբերյալ։ Այս գործընթցից հետո ընտրական օրենսգրքի փաթեթի քննարկումը, ընդունումը որևէ կերպով արդեն չի վերաբերելու հունիսի 20-ին կայանալիք ընտրություններին։
Ընտրական բարեփոխումների աշխատանքային խմբի անդամ, Իրազեկ քաղաքացիների միավորում ՀԿ ծրագրերի համակարգող Դանիել Իոաննիսյանը «Առաջին լրատվական»-ի հետ զրույցում նկատեց, որ ընտրությունների նշանակվելուց հետո արդեն հնարավոր չէ խաղի կանոններ փոխել, իսկ եթե անգամ փոխվի էլ՝ դա չի կարող վերաբերել այս ընտրություններին։ Սկսած 2018-ից ընտրական բարեփոխումների վրա աշխատող Իոաննիսյանն այսօր արդեն արձանագրում է, որ իշխանության մեջ կան մարդիկ, ովքեր չեն ցանկանում ընտրական բարեփոխումները․«Իշխանության մեջ կան մարդիկ, ում ձեռք է տալիս այս վիճակը, կան մարդիկ, ովքեր չեն ցանկանում, որ այս նախագիծը ընդունվի։ Նրանց ձեռք է տալիս, որ Սերժ Սարգսյանի հագով կարված ընտրական օրենսգիրքը մնա»,-ասաց Իոաննիսյանը։
Մեր դիտարկմանը՝ ովքե՞ր են այդ մարդիկ, մեր զրուցակիցը պատասխանեց․«ԱԺ «Իմ քայլը» խմբակցության որոշ պատգամավորներ պետաիրավական հանձնաժողովից։ Ի վերջո հենց իրենք որոշեցին, որ պետք է հետաձգվի նախագծի քննարկումը։ Պետաիրավական հանձնաժողովում կան «Իմ քայլը» խմբակցությունից պատգամավորներ, ովքեր առհասարակ ամեն տեսակի բարեփոխում ձախողելու համար հազար ու մի պատճառ կարող են հորինել, կան պատգամավորներ, ովքեր հասկանում են, որ բարեփոխումներ պետք են, բայց չեն հասկանում ինչն է պետք, ինչը՝ ոչ և կան մարդիկ, ովքեր կոնկրետ ՔՊ-ում ինչ-որ գործողությունների համար են պատասխանատու և չեն ուզում, որ ընտրությունների ժամանակ իրենց կյանքը բարդանա և իրենք անընդհատ վերահսկողության տակ լինեն, գործեն ավելի խիստ վերահսկողության տակ։ Ի վերջո կա Կենտրոնական ընտրական հանձնաժողովը, որը ևս շատ իներտ է»։
Իոաննիսյանն ասաց, որ ԸՕ փոփոխությունների ամբողջական փաթեթը չընդունելը և գործող ԸՕ-ով ընտրությունների գնալը (բացառությամբ ռեյտինգային ընտրակարգի) իր բացասաական ազդեցությունը թողնելու է ընտրությունների վրա։ Առաջարկվող կարգավորումները նրա համար էին, որ ընտրությունները նոր որակի լինեին, իսկ առանց դրանց, բնականաբար, ընտրությունները լինելու են ավելի վատը։ «Կան նաև այլ հանգամանքներ, որոնք ազդում են ընտրությունների վրա, բայց ամենակարևոր հանգամանքներից մեկը հենց ընտրական օրենսգիրքն էր, որը, արդեն պարզ է, որ այս ընտրությունների ժամանակ չի փոփոխվելու, կամ փոփոխվելու դեպքում էլ չի վերաբերելու այս ընտրություններին։ Այսինքն կարող ենք արձանագրել, որ իշխանությունը ձախողեց ընտրական բարեփոխումները և միակ բանը, որ արեց, դա ընտրակարգը փոխելն էր»,-եզրափակեց Դանիել Իոաննիսյանը։
