Ադրբեջանական Trend լրատվական գործակալության փոխանցմամբ՝ Աջարիայում գրանցվել է ձկների զանգվածային սատկելու դեպք։ Վերջին օրերին Բաթումի մոտ գտնվող լճերում հայտնաբերվել է անհասկանալի պատճառով սատկած մի քանի հարյուր կիլոգրամ ձուկ։
Այն բանից հետո, երբ այդ տեղեկատվությունը հայտնվեց մամուլում, տեղական իշխանությունները ձեռնամուխ եղան տեղի ունեցածի հետազոտմանը։ Շրջակա միջավայրի պահպանման նախարարությունը հայտարարել է, որ ձկների սատկելու պատճառը ջրում թթվածնի խտության նվազումն է, ինչի պատճառը շոգ եղանակն է։
Նախարարությունը հայտնում է, որ թթվածնի պակասի պատճառով սատկում են նաև Սև ծովից այդ լճեր ներթափանցած դիմացկուն ձկները։ Այժմ Աջարիայի մյուս լճերն ու ջրամբարները գտնվում են մասնագետների ուշադրության ներքո։
Դեռևս հաշվարկված չէ պատճառված վնասի չափը։
