Վարչապետ Նիկոլ Փաշինյանը կայացրել է որոշում Արգիշտի Քյարամյանին ԱԱԾ պետի պաշտոնից հեռացնելու և նրա փոխարեն պետի ժամանակավոր պաշտոնակատար Միքայել Համբարձումյանին նշանակելու մասին, որը մինչ այդ ԱԱԾ տնօրենի տեղակալն էր: Ասել, որ պատերազմի ընթացքում ԱԱԾ պետի փոփոխությունը հույժ կարևոր որոշում է և թերևս թելադրված է խիստ անհրաժեշտությամբ, եթե պատերազմի պայմաններում կայացվում է այդպիսի որոշում՝ նշանակում է թերևս չասել ոչինչ:
Այդ փոփոխության մասին թերևս շատ բան ասել է հենց ինքը՝ վարչապետ Փաշինյանը, դրանից ժամեր առաջ արված ֆեյսբուքյան բավականին անսպասելի գրառումով: Դա այն մասին էր, որ պատերազմի ժամանակ ինչ-որ մարդիկ եղել են դիրքերում և զինվորներին փորձել են համոզել, թե «Նիկոլը հողերը ծախել» է, և պատերազմն ընդամենը բեմականացում է, իսկ զինվորները՝ դրա զոհերը: Ըստ վարչապետի գրառման՝ այդ մարդիկ, «ըստ որոշ տեղեկությունների՝ զինվորներին համոզելով, նույնիսկ հրամայելով ստիպել են որոշ մարտական դիրքեր թողնել թշնամուն: Իմ հանձնարարությամբ ԱԱԾ-ում սկսվել է հետաքննություն, և գործող գլխավոր անձանցից մեկը, որ Ստեփանակերտի բնակիչ է, հայտնաբերվել և ձերբակալվել է Երևանում»:
Սա Գերագույն գլխավոր հրամանատարի իսկապես անսպասելի գրառում է և թերևս էապես անհրաժեշտ համարված գրառում, որ արել է վարչապետ Փաշինյանը: Հատկանշական է, որ նախօրեին վարչապետը նաև հեռախոսազանգեր էր ունենում առաջնագիծ՝ խոսելով զինվորների և հրամանատարների հետ: Ընդհանրապես, անցնող պատերազմական օրերին հանրության շրջանում տարբեր խոսակցությունների մակարդակով շրջանառվում էր այն, որ կան որոշակի տարօրինակ դրսևորումներ, տարբեր խմբեր, որոնք ծավալում են անհասկանալի գործունեություն:
Վարչապետի գրառումը գործնականում հաստատում է երկու բան՝ նախ, որ այդ խոսակցությունները չեն եղել անհիմն, և երկրորդ՝ ազգային անվտանգության մարմինները կարողացել են հավաստանշել խնդիրներն ու վերցնել իրավիճակը վերահսկողության տակ՝ կատարելով նաև ձերբակալություններ: Ըստ ամենայնի հենց այն հանգամանքը, որ իրավիճակը ԱԱԾ-ն վերցրել է իր լիակատար վերահսկողության ներքո, թույլ է տվել վարչապետ Փաշինյանին բարձրաձայնել խնդրի մասին:
Միևնույն ժամանակ, դրանից հետո ԱԱԾ պետ Քյարամյանի պաշտոնանկությունը առնվազն առաջացնում է հարց՝ դրա պատճառը եղել է Քյարամյանի անարդյունավետ աշխատա՞նքը, որի հետևանքով ծագել է խնդիրը, թե՞ ավելի վատ՝ ներգրավվածությունը որևէ հակապետական սխեմայի մեջ: Քննությունը կպարզի դրա մասշտաբը: Միաժամանակ կարևոր է վարչապետի կոչը, որպեսզի քաղաքացիները որևէ կասկածելի և տարօրինակ պահվածքով անձի կամ խմբավորման պարագայում նախ լինեն զգոն, միևնույն ժամանակ հայտնեն անվտանգության կառույցներին՝ նաև հետին թվով, այսինքն՝ եթե այս ընթացքում նշմարել են այդպիսի պահվածք:
Մեծ հաշվով, անշուշտ, որևէ անսպասելի բան չկա, որ թշնամին փորձում է գտնել հող նաև ներսում՝ թիկունքում. դա պատերազմների օրենքն է: Եվ շատ կարևոր է, որ պետությունը փաստորեն պատրաստ է նաև այդ ճակատում լիարժեք հարված հասցնել թշնամուն: Իհարկե, այստեղ նաև պետք է հստակ և լիարժեք պարզել, թե հատկապես ում կամ ինչի՞ վրա է հենվել թշնամին, եղե՞լ է այդ շարքում քաղաքական շահագրգռություն ոմանց մոտ, կա՞ն այլ արտաքին թելեր, ո՞ւր են դրանք տանում և այլն:
Առայժմ հարկ է արձանագրել ԱԱԾ վերահսկողության հանգամանքը և իրավիճակի տիրապետումը: Մնացյալ հարցերը քննությունից և պատերազմում հաղթանակից հետո, բոլոր հարցերը՝ մեկ առ մեկ, անուն առ անուն, և պատասխանները:
