Թուրքիայի նախագահ Աբդուլահ Գյուլը հայտարարել է, որ եվրոպացի քաղաքական եւ մտավորական շրջանակներում բացակայում է Թուրքիայի` Եվրամիությանը անդամակցության վերաբերյալ տեսլականը: Այս մասին գրում է գերմանական Suedeutsche Zeitung օրաթերթը:
Գյուլի մեկնաբանությունը հետեւել է Ֆրանսիայի արտաքին գործերի նախարար Բերբար Քուշների այն հայտարարությանը, որտեղ Քուշները Թուրքիային մեղադրում էր Եվրամիության անդամակցության ճանապարհին համապատասխան բարեփոխումներ չիրականացնելու մեջ:
Գյուլն ընդունել է, որ Թուրքիան էլ իր պարտավորություններն ունի, սակայն Եվրոպայի մեղքն է համարել բանակցությունների դանդաղումը. «Ամենահիմնական պատճառը, որը դանդաղեցնում է բանակցությունները, եվրոպական քաղաքական գործիչների եւ մտավորականների մոտ տեսլականի բացակայության եւ ռազմավարական մտածելակերպի բացակայությունն է»:
«Նրանք պետք է մտածեն 25, 50 եւ 100 տարվա կտրվածքով»,-ասել է Գյուլը: «Բայց եթե դու մտածում ես այսօրվա մասին, գործընթացը խոչընդոտվում է»:
Գյուլը 2.5-միլիոնանոց թուրքական համայնքին կոչ է արել ավելի լավ ինտեգրվելու գերմանական հասարակությանը: «Եթե մեկը չի խոսում այնտեղի լեզվով, որտեղ ապրում է, դա չի օգնում ո՛չ այդ մարդուն, ո՛չ երկրին, ո՛չ էլ հասարակությանը»,- ասել է Գյուլը: «Այդ պատճառով է, որ ես յուրաքանչյուր հնարավորության դեպքում ասում եմ, որ նրանք պետք է սովորեն գերմաներեն, մաքուր եւ առանց ակցենտի խոսեն, եւ դա պետք է սկսել բարուրից»: Նա բերել է Գերմանիայի հավաքականի ֆուտբոլիստ Մեսութ Օզիլի օրինակը, որը այդպիսի ինտեգրացիայի լավագույն դեպքն է: