Այսօր՝ փետրվարի 6-ին, Ազգային ժողովում հրավիրվել է արտահերթ նիստ: Քննարկվելու է «Սահմանադրությունում փոփոխություններ կատարելու մասին» օրենքի նախագիծը:
«Նախագիծը այս ձևով չի կարող գնալ հանրաքվեի: Սակայն բազմաթիվ ընթացակարգեր են խախտվել, և ես հիմա այլ բան եմ ուզում արձանագրել: Վարչապետի ելույթի մի մեծ հատված ՍԴ դատավոր Վահե Գրիգորյանի ելույթից էր, մի հատվածը ԱԺ նախկին նախագահի և նախկին ԱԺ աշխատակազմի ղեկավարի նկատմամբ հարուցված հայտնի քրեական գործից էր»,- հայտարարեց «Լուսավոր Հայաստան» խմբակցության ղեկավար Էդմոն Մարուքյանը:
Նրա խոսքով՝ այսօր աշխատում են Սերժ Սարգսյանի, Ռոբերտ Քոչարյանի կողմից նշանակված դատավորներ. «Ուրեմն այս տրամաբանությունը կարելի է կիրառել նաև նրա՞նց վրա»:
Մարուքյանը նշեց, որ իրեն ամենից ավելի մտահոգում է այն մոտեցումը, որ այսօրվա որոշումները իրավական ճանապարհով վիճարկող ուժերին է վարչապետը սպառնում. «Ասում եք, որ այդ ուժերը կհամարվեն հակապետական ուժեր, իսկ ովքեր կաջակցեն, կհամարվեն ազգի նվիրյալներ: Այսինքն՝ դո՞ւք եք որոշում, թե ովքեր են հակապետական ուժերը և ովքեր՝ ազգի նվիրյալնե՞րը: Մենք այս ուր եենք գնում, պարոն վարչապետ: Սա՞ է ձեր երազած ժողովրդավարությունը: Քանի դեռ մենք այս պառլամենտում ենք, ոչ մի գործադիրի ղեկավարի թույլ չենք տա մատ թափ տալ պառլամենտի վրա: Ձեր մոտեցումները մեզ լավ տեղ չեն տանի: Սա պոլիտբյուրո չի դառնալու: Չփորձեք ՀՀ որևէ քաղաքացու հռչակել հակապետական ուժ, ես կկանգնեմ թեկուզ մեկ քաղաքացու կողքին»:
Խմբակցության ղեկավարը տեղեկացրեց, որ «Լուսավոր Հայաստան»-ը դեմ կքվեարկի սահմանադրական փոփոխությունները հանրաքվեի դնելու մասին որոշման նախագծին. «Խնդրում եմ ձեզ հետ չհամաձայնող մարդկանց հետ այդ լեզվով չխոսել: Դա ոչ ոք կուլ չի տալու»:
Մանրամասները՝ տեսանյութում:
