Այն, ինչ կատարվել է այս մեկ տարվա ընթացքում Ազգային ժողովում, այն քիչ մասն է, որ կարող էինք անել. պետք չի բավարարվել եղածով: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արփինե Դավոյանը՝ ամփոփելով 2019 թվականը:
«Հաջորդ տարիներին ավելի մեծ աշխատանք ունենք կատարելու և մեզ վրա աշխատելու, որովհետև խնդիրները բավական շատ են: ԱԺ պատգամավորական գործունեությունը բավական բարդ է, այն չէ, ինչ ես պատկերացնում էի, ավելի բարդ ու պատասխանատու է: Մենք մեր գործողություններով, մեր ասելիքով պետք է պատասխանատու լինենք մեր ընտրողների առջև: Այն անելիքները, որ նախանշել ենք մեզ համար, դեռևս կատարման փուլում են և յուրաքանչյուր օրն ավելի արդյունավետ պետք է լինի նախորդից»,-ընդգծեց նա:
Դիտարկմանը, որ «Իմ քայլը» խմբակցության 88 պատգամավորից 11-ը մեկ տարվա ընթացքում ոչ մի ելույթ, ոչ մի հարց չի բարձրաձայնել, որևէ օրենսդրական նախաձեռնությամբ հանդես չի եկել, Դավոյանն արձագանքեց. «Չեմ կարծում, որ դա խնդիր է: Կարծում եմ, որ երևի մեր պատգամավորները մեծ աշխատանք պետք է կատարեն իրենց վրա, որ ձեր նշած փաստը չարձանագրվի: Պետք է բոլորս մտածենք մեր անհատական աշխատանքի մասին, որը պետք է վերածվի թիմային աշխատանքի»: