Մատենադարանում օրերս տեղի ունեցավ «Հրանտ Մաթևոսյան» մշակութային կենտրոն-թանգարանի Էսքիզ-հայեցակարգի շնորհանդեսը: «Հրանտ Մաթևոսյան» մշակութային կենտրոն-թանգարանի կառուցումը սկսվել է 2015թ-ից, 2018թ-ին շինարարությունը ընդհատվել է, և շենքը մնացել է կիսակառույց, երրորդ հարկը չի կառուցվել, ներքին հարդարումը չի ավարտվել, էքսպոզիցիոն գաղափարն իրականացված չէ. այսինքն՝ շենքը, որպես թանգարան և որպես կենտրոն, դեռևս պատրաստ չէ»,- «Առաջին լրատվական»-ի հետ զրույցում այս մասին ասաց գրողի որդին՝ «Հրանտ Մաթևոսյան» մշակութային հիմնադրամի տնօրեն Դավիթ Մաթևոսյանը:
Անդրադառնալով հարցին, թե ինչ նպատակով էր կազմակերպվել շնորհանդեսը՝ Դավիթ Մաթևոսյանը նշեց, որ շնորհանդեսն արվել է գործնական նպատակով. «Սեպտեմբերի 18-ին վարչապետի մոտ տեղի ունեցավ խորհրդակցություն, որին մասնակցում էին նաև շենքի ճարտարապետը և շինարարը, բայց նախագծի համահեղինակները չէին մասնակցում, որովհետև չգիտեինք, թե ինչ ձևաչափով է լինելու հանդիպումը: Խորհրդակցությունն արդյունավետ ավարտ ունեցավ, ի տարբերություն ընթացքի: Տատամսած վիճակ էր. Կրթության, գիտության, մշակույթի և սպորտի նախարարը և փոխնախարարը անորոշ բաներ ասացին այն մասին, որ շենքն առանց մեզ էլ կարող են շահագործել:
Ես գաղափարներ առաջարկեցի հայեցակարգի վերաբերյալ… Առաջարկեցի հանդես գալ էսքիզ- հայեցակարգով, որով բոլոր հարցերի պատասխանները կտրվեն:
Վարչապետը հանձնարարեց դրան ավելացնել նաև բիզնես պլանի գաղափարը: Նշված ժամկետում մենք մեր անելիքն ավարտեցինք:
Վարչապետը հանձնարարել էր գիտության, կրթության, մշակույթի և սպորտի նախարարին, «Հրանտ Մաթևոյան» հիմնադրամի տնօրենի, շահագրգիռ այլ կողմերի հետ քննարկել բոլոր ասպեկտները և ներկայացնել առաջարկներ:
Նախարարությունում մենք հոկտեմբերի 3-ին մասնակցեցինք խորհրդակցության, ոչինչ չստացանք: Մենք մեր տեսակետները հայտնեցիքն, փոխնախարարն առարկեց: Առարկությունը, որ հետագայում ավելի կուռ ձևակերպվեց «Առավոտին» տված հարցազրույցում, մոտավորապես հետևյալն էր. «Ամեն տեղից վեր կացողը հո իր հոր համար թանգարան չի սարքելու»:
«Կառավարությունը կամք և պատվախնդրություն պետք է ունենա՝ ասելու՝ սարքում ենք կամ չենք սարքում»,- ընդգծեց Դավիթ Մաթևոսյանը:
Մանրամասն՝ տեսանյութում:
