Լուրեր
Սահմանադրական դատարանի մասին օրենքի նախագիծը լուծելու է գլոբալ խնդիր. Ռուստամ Բադասյան

Կառավարությունն այսօր հավանություն տվեց Սահմանադրական դատարանի մասին օրենքում լրացումներ կատարելու մասին նախագծին: Թեմայի շուրջ «Առաջին լրատվական»-ի հետ զրույցում արդարադատության նախարար Ռուստամ Բադասյանը նշեց, որ այս նախագծով ներդրվում է կամավոր վաղ կենսաթոշակի ինստիտուտը: Այն դատավորների վաղ կենսաթոշակային համակարգի ներդրման նախագիծ է: «Նպատակն է կյանքի կոչել 2015թ. փոփոխություններով հռչակված Սահմանադրական դատարանի մոդելը, որով, որպես լավ լուծում, առաջարկվել է, որ Սահմանադրական դատարանի ինը դատավորներ առաջադրվելու են երեք տարբեր մարմինների կողմից՝ նախագահի, կառավարության և դատավորների ընդհանուր ժողովի կողմից և ընտրվելու են ԱԺ-ի կողմից. այս մոդելը հավասարակշռված Սահմանադրական դատարան է ապահովում, բայց այս մոդելը կարող է կյանքի չկոչվել, քանի որ կան բազմաթիվ խոչընդոտներ»:

Նախարարի խոսքով՝ այս նախագծով նաև լուծվում է մեկ այլ գլոբալ խնդիր՝ դատավորների բարեվարքության խնդիրը. «Հռչակվել է նպատակ, որ դատական համակարգում պետք է աշխատեն այնպիսի մարդիկ, ովքեր իրենց գործունեությամբ նպաստում են արդարադատության շահերի պաշտպանությանը: Ներդրվելու է գույքային ստուգման գործիքակազմ, դատավորների կարգապահական հանձնաժողովի մոդելն է փոխվում, այս բարեփոխումները միտված են բարեվարքության ստուգմանը:

Շատ երկրներում այդ գործիքները ներդրվել են որպես անցումային արդարադատության գործիքներ. հիմնական բովանդակային իմաստն այն է, որ դատավորի թեկնածուները կամ տարբեր իրավական մարմինների թեկնածուները պետք է անցնեն ստուգման ընթացակարգ»:

Արդարադատության նախարարի դիտարկմամբ՝ Սահմանադրական դատարանի շուրջ ստեղծվել է ճգնաժամ, և դրանով է պայմանավորված վաղ կենսաթոշակային համակարգի ներդրման անհրաժեշտությունը: «Ամբողջ դատական, իրավական համակարգում առկա է լուրջ ճգնաժամ, իսկ ՍԴ ճգնաժամի առանձնահատկությունն այն է, որ նաև ՍԴ նախագահի ընտրությունն է կատարվել կասկածելի ընթացակարգով»:

Անդրադառնալով ՍԴ շուրջ ստեղծված ճգնաժամը հաղթահարելուն ուղղված ԱԺ քայլին՝ Ռ. Բադասյանը նշեց, որ ՍԴ-ն հիմք չուներ ԱԺ-ի դիմումը չքննելու. «ՍԴ-ն, չքննելով դիմումը, խորացրեց ճգնաժամը: Դրանով կասկած է հարուցվում ամբողջ պրոցեսի նկատմամբ»:

Մանրամասն՝ տեսանյութում:

  • Դիտումներ՝ *