Միացյալ Նահանգների կառավարությունը նախատեսում է կրճատել Արցախին տրամադրվող ֆինանսական աջակցությունը, որի նպատակն էր ականապատված տարածքների ականազերծումը: Այս մասին հայտարարություն է տարածել Հայ Դատի հանձնախումբը և նշել, որ ջանքեր է գործադրում այդպիսի զարգացում թույլ չտալու համար: Թեմայի շուրջ «Առաջին լրատվական»-ի հետ քննարկմանը մասնակցեցին միջազգայնագետ Սուրեն Սարգսյանը և ԱԺ «ԻՄ քայլը» խմբակցության պատգամավոր Սոս Ավետիսյանը:
Սոս Ավետիսյանի խոսքով՝ գործադիր մարմինը չէ, որ հաստատում է Հայաստանին և Արցախին տրվող օգնությունը, այլ դա անում է Կոնգրեսը. «Հենց այդտեղ է պետք աշխատանք տանել, որպեսզի կարողանանք ազդել այդ որոշման դրակական կայացման վրա»:
Սուրեն Սարգսյանը պարզաբանելով, թե ինչպես է ընդհանարպես ԱՄՆի կողմից օգնությունն իրականացվում, նշեց, որ ինչպես Հայաստանում, այնպես էլ ԱՄՆ-ում պետբյուջեի նախագիծը համապատասխան գերատեսչությունների կողմից մշակվում է և ներկայացվում է Օրենսդիր մարմնին, իսկ Օրենսդիրը իրավունք ունի փոփոխություններ անել, հետո նոր ներկայացնել նախագահի վավերացմանը: «Կենկրետ Արցախին տրամադրվող օգնությանը վերաբերող որոշումները միշտ ընդունվել են Ներկայացուցիչների պալատում, այս ծրագրի բացառիկությունը կայանում էր նրանով, որ այն հումանիտար էր: Այս ակտիվ փուլը սկսվել է հենց այն պահին, երբ որ ֆիքսվել է, որ այդ օգնության մասին տողը հանվել է: Կարծում եմ՝ այս որոշումը կապված չէ հայաստանյան կամ արցախյան ներքաղաքական գործընթացների հետ, սա զուտ ԱՄՆ-ի և ադմինիստրացիայի առաջնահերթությունների հետ է կապված»:
Միջազգայնագետի խոսքով՝ Թրամփը կրճատում է իր համար կարևոր նշանակություն չունեցող երկրների օգնությունը: «Թրամփը հայտարարել էր, թե ՄԱԿ-ում քվեարկություններին ուշադիր հետևելու են և ըստ դրա էլ որոշելու են, թե ինչպես են օգնելու քվեարկող պետություններին: Մենք այդ ժամանակ կողմ քվեարկեցինք մի բանաձևի, որն ԱՄՆ- ի շահերից չէր բխում: Եվ մեզ համար սկզբունքային հարցում ԱՄՆ-ն այսպիսի քայլ է կատարում»,- ընդգծեց Ս. Սարգսյանը:
Մանրամասն՝ տեսանյութում: