Հայ սպառողներին ջուրը պիտի հասներ այլ՝ շատ ավելի մատչելի գնով, մինչդեռ հակառակն է տեղի ունեցել. «Երևան Ջուր» ընկերությունը դիմել է Հանրային ծառայությունները կարգավորող հանձնաժողովին՝ ջրի սակագինը 7 դրամով բարձրացնելու առաջարկով:
Սպառողների իրավունքների պաշտպանները հանրության ուշադրությունն են հրավիրում այս հանգամանքի վրա և բողոքի ձայնը բարձրացնելու կոչ անում: Սպառողների խորհրդատվական կենտրոն ՀԿ նախագահ Կարեն Չիլինգարյանը նշեց, որ ջրի սակագինը կազմվում է մի քանի բաղադրիչով՝ սղաճ, տարադրամի փոխարժեք՝ 40-ական տոկոս, էլ. Էներգիայի ծախս՝ 10 տոկոս: «Մենք միշտ դեմ ենք եղել, որ տարադրամի փոխարժեքը մտցվի, չէ՞ որ այն ներկրվող ապրանք չի, սակայն, ցավոք, ժամանակին պայմանագիրը կնքվել է: Հիմա մենք ամեն կերպ պետք է պայքարենք, որ սակագինը չբարձրանա»,- ասաց նա:
Սպառողների միության նախագահ Արմեն Պողոսյանը նշեց, որ սակագնի կազմման հատուկ ձև կա. ծախսերը բաժանվում են քանակի վրա, գոյանում է միավորի արժեքը, սակայն ծախսերը և քանակը՝ երկուսն էլ, իր համար կասկածելի են: Պողոսյանը նկատեց՝ ջրառը ֆանտաստիկ թիվ է, իսկ մենք գործնականում դրա մոտ 20 տոկոսն ենք օգտագործում, 80 տոկոսը կորչում է, աշխատանքի արդյունքը մենք չենք տեսնում: Նա նշում է, որ գոյություն ունի աուդիտ, դրա արդյունքները պետք է հրապարակվեն, որպեսզի ավելի առարկայական խոսեն:
«Գոյություն ունի 10 տարվա սցենար. Ջրի սակագինը պիտի երրորդ տարուց սկսեր նվազել, և տասներորդ տարում մենք ունենայինք 95 դրամ, բայց կյանքը ցույց է տալիս՝ յոթերորդ տարին է, իսկ մենք խոսում ենք ոչ թե նվազման, այլ աճի մասն. պայմանագրի հիմնական կետը խախտված է»,- ասաց նա: Պողոսյանը նկատեց՝ ջրի սակագնի վերաբերյալ ոչ թե քննարկում է պետք, այլ քննարկումների շարք՝ տարբեր ձևաչափերով:
Սպառողների իրավունքների պաշտպաններն իրենց դժգոհության սլաքն ուղղում են դեպի կառավարման մարմիններ, սակայն կարծում են՝ մարդիկ պետք է նաև ինքնաքննադատաբար մոտենան: «Ո՞ւր են ՀԿ-ները, բոլորը իրավապաշտպան են, շատ հեշտ է Լոնդոնից մեկնել Ռիո դե Ժանեյրո, խոսել այն մասին, ինչին տեղյակ չես»,- ասաց նա:
