ՀՀ արտաքին հարաբերությունների մշտական հանձնաժողովի նախագահ Ռուբեն Ռուբինյանը նախօրեին տեղեկացրեց, որ ՌԴ դեսպանն անցած ուրբաթ հրավիրվել է ԱԳՆ, որտեղ դեսպանի հետ տեղի է ունեցել զրույց ՀՀ ներքին գործերին չմիջամտելու համատեքստում։
Հիշեցնենք նաև, որ Ռուսաստանի դեսպանատնից հայտնել էին, որ ՌԴ դեսպանը Քոչարյանի հետ հանդիպել է քաղաքական և գործարար շրջանակների ներկայացուցիչների հետ իր հերթական հանդիպումների շրջանակներում: Օրերս այդ հանդիպման վերաբերյալ բավականին կոշտ արձագանք էր տվել ԱԺ նախագահ Արարատ Միրզոյանը, որը նշել էր, որ հանդիպման հանգամանքը չի ողջունում և իր այդ դիրքորոշումը բացատրել էր հետևյալ կերպ. «Ի վերջո, որևէ երկրի դեսպան կարող է քաղաքական դաշտի ողջ սպեկտորի ներկայացուցչների հետ հանդիպել, այստեղ ուրիշ բան կա՝ այն մեղադրանքները, որոնք այդ անձին ներկայացված են, մի փոքր դուրս է դնում էդ մարդուն մաքուր քաղաքական դաշտից։ Այդտեղ շատ այլ որակների, շահագրգռությունների մասին է խոսքը, հենց դրա համար էլ չեմ ողջունում։ Այսինքն՝ ես չեմ տեսնում Ռոբերտ Քոչարյանին որպես քաղաքական գործիչ և քաղաքական դաշտի ներկայացուցիչ, այլապես ես կողջունեի Ռուսաստանի դեսպանի, կամ այլ որևէ դեսպանի շփումն իր հետ»։
«Առաջին լրատվական»-ի հետ զրույցում «Ռեգնում» լրատվական գործակալության գլխավոր խմբագիր, քաղաքական վերլուծաբան Մոդեստ Կոլերովը նշեց՝ ԱԳՆ-ում իրենց աղբյուրը վստահեցնում է՝ Հայաստանում ՌԴ դեսպանին ԱԳՆ-ում որևէ գանգատ չի ներկայացվել. «Եղել է սովորական հանդիպում և զրույց»։
Կոլերովը միևնույն ժամանակ նշեց. «Այն, ինչ հիմա արվում է Քոչարյանի հանդեպ՝ մեր հարաբերությունների վրա բացասաբար կանդրադառնա։ Այն դժգոհությունները, որ արտաբերեց Հայաստանի ԱԺ խոսնակը մեր դեսպանի հասցեին՝ իրավական դաշտից առհասարակ դուրս է։ Ես հասկանում եմ, որ ձեր ԱԺ խոսնակը իրավաբան չէ, բայց իր պաշտոնը ենթադրում է, որ նա պետք է տարրական կանոնները պահպանի»։
Մեր զրուցակիցը շարունակեց. «Երբ նա մեր դեսպանի հետ կապված դժգոհություններ է ներկայացնում, որ նա Քոչարյանի հետ է հանդիպել և ասում, որ Քոչարյանի դեմ գործ է հարուցված և դրա համար չի կարելի նրան հանդիպել՝ նա շատ կոպիտ, ցուցադրաբար, անամոթաբար, սկանդալային կերպով, ես նույնիսկ կասեի՝ բարբարոսաբար խախտում է օրենքի ամենաֆունդամենտալ սկզբունքը՝ անմեղության կանխավարկածը։ Հետո ի՞նչ, որ Քոչարյանի դեմ գործ է հարուցված, վաղն էլ նրա դեմ կարող է գործ հարուցվել, և ի՞նչ։ Մինչև դատարանը մարդուն մեղավոր չճանաչի՝ նա անմեղ է։ Չգիտե՞ք այդ սկզբունքը՝ կոչվում է անմեղության կանխավարկած։ Ձեր մոտ, ինչպես նաև մյուս բոլոր նորմալ երկրներում, դա ամրագրված է Սահմանադրության մեջ։ Հիմա ստացվում է ի՞նչ՝ ԱԺ խոսնակը խախտում է անմեղության կանխավարկա՞ծը, դա սկանդալ է, բարբարոսություն ու ամոթ»։
Մեր այն հարցին, թե, այնուամենայնիվ, դեսպանի հանդիպումը Քոչարյանի հետ կարելի՞ է համարել Ռուսաստանի քաղաքական աջակցությունը նրան, Մոդեստ Կոլերովը պատասխանեց. «Առաջին հերթին դեսպանը պետք է հանդիպի բոլոր քաղաքական ուժերի հետ, դա այբուբեն է։ Երկրորդ՝ Քոչարյանին աջակցություն հայտնել է անձամբ Պուտինը, այդ պատճառով մեր դեսպանը ևս Քոչարյանին աջակցություն է հայտնում»։
