Բոլոր ձեռնարկությունները, որոնք գտնվում են Ղրիմի տարածքում՝ Ուկրաինայի պետական սեփականության ներքո, կազգայնացվեն: Այս մասին հայտարարել է Ղրիմի ինքնավարության կառավարության առաջին փոխվարչապետ Ռուսլան Թեմիրգալիևը՝ փոխանցում է BBC-ն:
Նրա խոսքով՝ մասնավոր բիզնեսի ողջ ունեցվածքը կվերագրանցվի՝ համապատասխան ռուսական օրենսդրության:
Ռուսաստանի կազմի մեջ ինքնավարության մտնելու մասին Ղրիմի Գերագույն խորհրդի որոշումն ուժի է մնում ընդունման պահից՝ այսօրվանից, նշել է փոխվարչապետը:
Նրա խոսքով՝ ներկայում Ղրիմի տարածքում միակ օրինական զինված ուժերը հանդիսանում են ռուսական ուժերը: «Այլ պետությունների զինված ուժերը կհամարվեն օկուպանտներ՝ համապատասխան հետևանքներով»,-հայտարարել է Թեմիրգալիևը:
Նա հավելել է, որ Ղրիմը պատրաստ է իր տարածք ներմուծել ռուսական ռուբլին:
Նրա խոսքով՝ եթե Ղրիմի բնակիչները մարտի 16-ին կայանալիք հանրաքվեին դեմ քվեարկեն Ռուսաստանին միանալուն, ապա Ղրիմի Գերագույն խորհուրդը վայր կդնի լիազորությունները՝ որպես բնակչության վստահությունը չվայելող մարմին:
Ղրիմա-թաթարական մեջլիսի ղեկավար Ռեֆաթ Չուբարովն իր հերթին հայտարարել է, որ մեջլիսը չի ճանաչի հանրաքվեի արդյունքները: Նա վստահ է, որ արդյունքները կկեղծվեն:
